სანდრო გირგვლიანისა და ზურა გამცემლიძის ოჯახის წევრებმა საქართველოში ევროსაბჭოს ოფისის ხელმძღვანელს მიმართეს და სთხოვეს, რომ ვანო მერაბიშვილის საქმე, რომელსაც სტრასბურგის სასამართლოს დიდი პალატა მიმდინარე წლის 8 მარტს განიხილავს, ობიექტურად წარიმართოს. ამასთან, ისინი ინფორმაციას აწვდიან საქართველოდან წარგზავნილი მოსამართლე ნონა წოწორიასა და ადვოკატ ოთარ კახიძის შესახებ.
როგორც სანდრო გირგვლიანის მამამ გურამ გირგვლიანმა ჟურნალისტებთან საუბრისას განაცხადა, ნონა წოწორია 2004-08 წლებში იუსტიციის ყოფილი მინისტრის ზურაბ ადეიშვილის მოადგილე იყო. რაც შეეხება ადვოკატ ოთარ კახიძეს, გურამ გირგვლიანის თქმით, ის სხვადასხვა მაღალ თანამდებობებს იკავებდა, აქედან გამომდინარე, ჩნდება ეჭვი, რომ შესაძლოა სტარსბურგის სასამართლოს დიდი პალატის შემადგენლობა მოექცეს საქართველოდან წარგზავნილი მოსამართლისა და ადვოკატის გავლენის ქვეშ.
ჩვენ ვითხოვთ, ჩვენი ხმა მივაწვდინოთ სტრასბურგის დიდი პალატის იმ შემადგენლობას, რომელიც 8 მარტს ვანო მერაბიშვილის საქმეს განიხილავს. მოსამართლეები არ უნდა მოექცნენ საქართველოდან წარგზავნილი ნონა წოწორიას გავლენის ქვეშ, რომელიც ყველაფერს აკეთებს დანაშაულებრივი რეჟიმის დაცვისთვის. ნონა წოწორია არ იცავს საქართველოს სახელმწიფო ინტერესებს, ის იცავს ”ნაციონალური მოძრაობისა” და ვანო მერაბიშვილის ინტერესებს. ამასთან, მიჩნდება ეჭვი, რომ ხომ არ მოხდა საქართველოდან წარგზავნილი სამი მოსამართლის კანდიდატურის ხელოვნურად ჩაგდება, რადგან წოწორიას 1-ელ თებერვალს გაუვიდა ვადა”, – განაცხადა გურამ გირგვლიანმა.
სტრასბურგის ევროსასამართლოს გადწყვეტილებით თავზარდაცემული ხელისუფლება, რომელსაც რუსთავი 2 – ის ბლიცკრიგით აღების გეგმა ჩაეშალა, მარცხის მიზეზს არა საკუთარ ქმედებებში, არამედ ევროსასამართლოში საქართველოს წარმომადგენლის ნონა წოწორიას ფაქტორში ეძებს. ეს განცხადებაც სხვა არაფერია, თუ არა პირდაპირი მინიშნება იმაზე, რომ რუსთავი 2 – ის საქმესთან დაკავშირებით გადაწყვეტილების მიღებისას ვინსენტ დე გაეტანოზე ზეგავლენა მოახდინა მოსამართლე წოწერიამ, რომელიც ევროსასამართლოს სწორედ იმ სექციაში მუშაობს, რომლის ვიცეპრეზიდენტიც არის იგი.