პასუხები არ არსებობს, რადგან ადგილი აქვს უპრეცენდენტო მაქინაციას, კორუფციული სქემის მოქმედებაში მოყვანას, – ამის შესახებ, თბილისის საკრებულოს ფრაქცია „ერთიანი ნაციონალური მოძრაობის“ წევრმა მარიკა დათუკიშვილმა განაცხადა, რითაც მოსამართლე ნატა ნაზღაიძის ოჯახისთვის მილიონი ლარის გამოყოფის საკითხზე მერიის სამსახურების წარმომადგენლების საკრებულოში გამოუცხადებლობის თემას გამოეხმაურა.მისი თქმით, მომდევნო ნაბიჯი იქნება თბილისის მერის, დავით ნარმანიას დაბარება, შემდეგ კი დედაქალაქის მთავრობის იმპიჩმენტის საკითხი დადგება. „ჩვენ დავიბარებთ დავით ნარმანიას, რასაც 13 დეპუტატის ხელმოწერა სჭირდება. თუ ნარმანიაც არ ინებებს საკრებულოში მობრძანებას, ამ შემთხვევაში არაფერი დაგვრჩენია, გარდა იმისა, რომ ვიფიქროთ იმპიჩმენტზე. ტყუილად არ უნდა გადავუხადოთ მათ ხელფასი, რადგანაც არ ცნობენ არც კანონს და არც სამართალს. მათთვის არსებობს მხოლოდ ბიძინა ივანიშვილის სამართალი, მხოლოდ ის, რომ ბიძინა ივანიშვილს დაუკმაყოფილონ ის წყურვილი, რასაც „რუსთავი 2“-ის წართმევა ჰქვია და ამ მიზანს ემსახურება მთელი სახელმწიფო აპარატი“, – განაცხადა მარიკა დათუკიშვილმა.თბილისის მერის მოადგილეები ნატო ქიტიაშვილი და ირაკლი ლექვინაძე, ასევე, იურიდიული სამსახურის უფროსი სოფიო გიგანი და ქონების მართვის სამსახურის უფროსი კარლო ლაფერაძე საკრებულოს ოპოზიციურმა ფრაქციებმა და დამოუკიდებელმა დეპუტატებმა დაიბარა, თუმცა ისინი საკრებულოში არ მივიდნენ.თბილისის მერმა დავით ნარმანიამ საკითხზე კომენტირებისას განაცხადა, რომ საზოგადოებას აღნიშნულ საკითხთან დაკავშირებით ინფორმაცია არაერთხელ მიაწოდა. „საჭიროდ არ ჩავთვალეთ ჩვენი წარმომადგენლების გაგზავნა საკრებულოში – დღევანდელი შოუ არ შედგა“, – განაცხადა დედაქალაქის მერმა.
მარიკა დათუკიშვილი – თუ დავით ნარმანია საკრებულოში მობრძანებას არ ინებებს, იმპიჩმენტზე ვიფიქრებთ
Published on