22 ნოემბერს, სააკაშვილის საპრეზიდენტო ბიბლიოთეკაში გაიმართა დები ზარანდიების ხსოვნისადმი მიძღვნილი სტიპენდიის პროგრამის ახალი საფეხურის პრეზენტაცია. სტიპენდია დააწესა საქველმოქმედო-ჰუმანიტარული ფონდის SOCO-ს დამაარსებელმა, საქართველოს ყოფილმა პირველმა ლედიმ სანდრა რულოვსმა. ეს არის 8 თვიანი გრანტი, რომლის მიმღებნი არიან ქვეყნის სხვადასხვა უნივერსიტეტების სტუდენტები ხელმოკლე ოჯახებიდან. სანდრა რულოვსის ინიციატივით და მხარდაჭერით, ფონდი მათ ყოველთვიურად 150 ლარის სტიპენდიით დაეხმარება.
2015 – 2016 სასწავლო წელს დები ზარანდიების სახელობის სტიპენდია დაენიშნა 22 ეკონომიურად გაჭირვებულ სტუდენტს, მიმდინარე სასწავლო წელს მას უკვე 26 ახალგაზრდა მიიღებს. სტიპენდიანტებს შორის არიან დები ზარანდიების ოჯახის მიერ არჩეული სტუდენტებიც სამეგრელოდან და ის ახალგაზრდები, რომელთა ოჯახებიც 13 ივნისის სტიქიის დროს დაზარალდნენ, სტიპენდიის ერთერთი მიმღებია ზარანდიების ბიძაშვილიც.
,,ვიმედოვნებთ, რომ ეს სტიპენდია მათთვის იქნება სტიმული კარგი და წარმატებული სწავლისათვის.'' – განაცხადა მედიასთან საუბარში ლედი სანდრა რულოვსმა.