ეროვნული ვალუტის გაუფასურების ფონზე, ფასების მატებას არ გამორიცხავენ უმრავლესობაში, თუმცა აცხადებენ, რომ ლარის კურსი დასტაბილურდება და ვითარება დროულად გამოსწორდება.გია ვოლსკი ეროვნული ვალუტის გაუფასურების მიუხედავად, მოსახლეობას ყურადღების გამახვილებას პოზიტიურ ფაქტორებზე ურჩევს. „თუ დიდი ხნის განმავლობაში ვერ მოხდა კურსის დაბალანსება, ეს გარკვეულ გავლენას მოახდენს ფასებზეც, თუმცა არის სხვადასხვა ეკონომიკური მაჩვენებლები, ფაქტორები, რომელიც ალბათ, კომპლექსურად უნდა იყოს გათვალისწინებული. ასე რომ პოზიტიურ პროგნოზს ალბათ უფრო მეტი ყურადღება უნდა მივაქციოთ,“ – განაცხადა ქართული ოცნების ერთ-ერთმა ლიდერმა გია ვოლსკიმ.დაბალ ეკონომიკურ ზრდას უკავშირებენ ლარის კურსის გაუფასურებას ოპოზიციაში. ასევე შემცირებულ ინვესტიციებსა და ექსპორტს.მათი აზრით, ერთ-ერთი მიზეზი წინასაარჩევნოდ მმართველი გუნდის მიერ თანხის გადაჭარბებული ხარჯვა და არასწორი ეკონომიკური პოლიტიკაა.„უმთავრესი არის სუსტი ეკონომიკა და ნაკლები ინვესტიცია. სუსტია ექსპორტი, ამას ემატება ის, რომ ტურიზმისთვის ბოლო წლების განმავლობაში არაფერი გაკეთებულა, რომ ტურიზმიდან შემოსავლები გაზრდილიყო, ესეც ლარის კურსზე აისახება. საბოლოო ჯამში, მივდივართ იქამდე, რომ მთავრობის არასწორი ეკონომიკური პოლიტიკის შედეგია ის, რაც შემდეგ უკვე ლარზე აისახება,“ – აცხადებს ნაციონალური მოძრაობის წევრი პეტრე ცისკარიშვილი.