რუსეთის საგარეო საქმეთა სამინისტროს განცხადებას, სადაც ნათქვამია, რომ მათთვის საქართველოში საპარლამენტო არჩევნების შედეგები მისაღებია და მზად არიან თანამშრომლობის გაღრმავებისთვის, ნაციონალურ მოძრაობაში "მოთაფვლის" პოლიტიკად აფასებენ. მთავარ ოპოზიციურ პოლიტიკურ პარტიაში აცხადებენ, რომ საქართველოს ხელისუფლება რეალურად არ დგამს ნაბიჯებს იმისკენ, რომ მოხდეს ქვეყნის ინტეგრაცია ევროატლანტიკურ სივრცეში. "როგორც ჩანს რუსეთის ხელისუფლება ძალიან კმაყოფილია არჩევნების შედეგებით იმიტომ, რომ ხელისუფლებაში დარჩა პოლიტიკური ძალა, რომლისთვისაც დასავლური ორიენტაცია არის დეკლარაცია და რეალურად არაფერს არ აკეთებს იმისთვის, რომ მოხდეს ამ ქვეყნის ეკონომიკური და სხვა სახის ინტეგრაცია ევროატლანტიკურ სივრცეში. რუსეთმა როგორც ჩანს გადაწყვიტა, გადავიდეს შეტევაზე – ამჯერად მოთაფვლის პოლიტიკის გატარებით და შეეცადოს დაგვარწმუნოს იმაში, რომ რუსეთს უფრო მეტი შეუძლია შესთავაზოს საქართველოს ვიდრე დასავლეთმა,"- განაცხადა სალომე სამადაშვილმა.რუსეთის საგარეო საქმეთა სამინისტროს განცხადებას გამოეხმაურა ახალი მემარჯვენეების ერთ-ერთი ლიდერი მამუკა კაციტაძეც. "არჩევნებამდე რამდენიმე თვით ადრე გვახსოვს კარასინის განცხადებები, რომ რუსეთისთვის სულ ერთი არ არის როგორ დამთავრდება საქართველოში საპარლამენტო არჩევნები. ეს ყველაფერი შექმნა 2016 წლის საპარლამენტო არჩევნებმა, ამ არჩევნების შედეგები მოგვწონს თუ არა, როგორც მოცემულობას ისე უნდა შევხედოთ,"- აცხადებს კაციტაძე. შეგახსენებთ, რომ რუსეთის საგარეო საქმეთა სამინისტროს განცხადებაში აღნიშნულია, რომ ნოემბერში თბილისში რუსი ბიზნესმენები ჩამოვლენ.
.