არასამთავრობოები ზუგდიდის და სენაკის ინციდენტებზე განცხადებას ავრცელებენ, რასაც odishinews.ge უცვლელად გთავაზობთ:
ზუგდიდსა და სენაკში მომხდარ ინციდენტებთან დაკავშირებით არასამთავრობო ორგანიზაციების ნაწილმა ერთობლივი განცხადება გაავრცელა. განცხადების ავტორები გმობენ ყოველგვარ დაპირისპირებას წინასაარჩევნო პერიოდში და მოუწოდებენ ჩართულ მხარეებს ურთიერთპატივისცემისკენ. ისინი მიმართავენ სამართალდამცველებს, უზრუნველყონ უსაფრთხოება პოლიტიკური სუბიექტების შეხვედრებზე.“საუნჯე”, “სამოქალაქო საზოგადოების განვითარების ცენტრი” (CSDC)”, ,,ნაბიჯი სამოქალაქო ინტეგრაციისკენ” და ,,ჰელფინგ ჰენდი” მიიჩნევენ, რომ 2016 წლის 8 ოქტომბრის არჩევნების ერთ-ერთი ყველაზე დიდი გამოწვევა წინასაარჩევნო კამპანიის მშვიდ გარემოში წარმართვაა. არასამთავრობოთა განმარტებით, მხარეები კვლავ არ ცდილობენ თავი შეიკავონ აგრესიის გამოხატვისაგან, ხოლო შესაბამისი ორგანოები ვერ უზრუნველყოფენ უსაფრთხოებას.“1 ოქტომბერს, ერთიანი ნაციონალური მოძრაობის ზუგდიდის მაჟორიტარი დეპუტატობის კანდიდატის, სანდრა რულოვსის შეხვედრა ამომრჩეველთან სენაკში ჩაიშალა, როდესაც შეხვედრაზე ია მეტრეველი და კიდევ რამდენიმე ადამიანი მასთან გარკვეული კითხვებით მივიდა და ხელი შეუშალა რულოვსს შეხვედრის ჩატარებაში. მართალია, ხელშეშლა არ მომხდარა ძალის გამოყენებით, ხაზი უნდა გაესვას იმ გარემოებას, რომ ია მეტრეველი წარმოადგენს მმართველ ძალასთან დაახლოებულ პირს. მიუხედავად იმისა, რომ უკანონო ქმედებებს მისი მხრიდან ადგილი არ ჰქონია, მიგვაჩნია, რომ საარჩევნო სუბიექტის ამომრჩეველთან შეხვედრის ჩაშლა არ წარმოადგენს მისაღებ პრაქტიკას და უარყოფითად მოქმედებს ზოგადად წინასაარჩევნო გარემოზე. აღსანიშნავია, რომ ხსენებულ ინცინდენტს შეხვედრის ჩაშლის შემდგომ მოჰყვა შეხლა-შემოხლა, მართალია, ფიზიკურად არავინ დაშავებულა, თუმდა დაზიანდა ხელშემშლელთა ავტომანქანა, რაც მიუთითებს, რომ ძალადობა არ იყო გამორიცხული დაპირისპირების დროულად შეწყვეტა რომ არ მომხდარიყო. შეწყვეტაში კი სამართალდამცავ ორგანოებს მონაწილეობა არ მიუღიათ. ადგილობრივი თვითმმართველობის და სამართალდამცავი ორგანოების პასიურობა მიუღებელია. მათ უნდა შეასრულონ კანონმდებლობით დაკისრებული ვალდებულებები და უზრუნველყონ როგორც შეხვედრების უსაფრთხოება, ისე, ზოგადად მშვიდი საარჩევნო გარემო.
1 ოქტომბერს ზუგდიდის რაიონ სოფელ დიდი ნეძში „ქართული ოცნების” ახალგაზრდული ორგანიზაციის წარმომადგენელი გოგო ცემეს. გავრცელებული ინფორმაციით, სამი ახალგაზრდაა ნაცემი, მათ შორის ერთ-ერთი მძიმე მდგომარეობაშია, აღნიშნული ფაქტი ვიდეომასალიაშიცაა მოცემული. მედიის ინფორმაციით მომხდარი ინციდენტი კარდაკარის აქციის დროს მოხდა, როდესაც ხალგაზრდები არიგებდნენ ფლაერებს, ამ დროს „ქართული ოცნების” წარმომადგენელთა ინფორმაციით სოფლის ყოფილი გამგებელი ერთიანი ნაციონალური მოძრაობის წევრი პაპუნა კუკავა ახალგაზრდებს თავს დაესხა.
მომხდარი ინციდენტი წარმოადგენს სისხლის სამართლის 125-ე მუხლით დათველისწინებულ დანაშაულებრივ ქმედებას – ცემა ან სხვაგავარი ძალადობა რამაც დაზარალებულის ფიზიკური ტკივილი გამოიწვია,მაგრამ არ მოჰყოლია ჯანმრთელობის ხანმოკლე მოშლა ან საერთო შრომისუნარიანობის უმნიშვნელო ან არამყარი დაკარგვა, ითვალისწინებს ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ანდა გამასწორებელი სამუშაოთი ვადით თხუთმეტ თვემდე. აღნსანიშნავია, რომ ერთ-ერთი დაზარალებულის მდგომარეობა შეფასდა, როგორც საკმაოდ სერიოზული, შესაბამისად, შესაძლოა, სხვა, უფრო მძიმე დანაშაულთანაც გვქონდეს საქმე. სწორედ ამიტომაა მნიშვნელოვანი მყისიერი რეაგირება – დროული გამოძიება.
საქართველოს საარჩევნო კოდექსის მე-80 მუხლის თანახმად, კანონით დადგენილი წესით წინასაარჩევნო მოწოდებების, განცხადებების, წარწერების, ფურცლების, ფოტო- და სხვა მასალების გავრცელებისათვის ხელის შეშლა და ჩამორთმევა, აგრეთვე სააგიტაციო დანიშნულების ავტოსატრანსპორტო და სპეციალური მოწყობილობით აღჭურვილი სხვა საშუალებების ჩამორთმევა ან წინასაარჩევნო აგიტაციის მიზნით მათი გამოყენებისათვის ხელის შეშლა – გამოიწვევს დაჯარიმებას 1 000 ლარის ოდენობით.ვგმობთ ყოველგვარ ძალადობას წინასაარჩევნო პერიოდში და მოვითხოვთ დროულ გამოძიებას, ისევე, როგორც სამართალდამღვევი პირის დასჯას. როგორც მისიის მიერ არაერთხელ აღინიშნა, მსგავსი შემთხვევები უარყოფითად მოქმედებს წინასაარჩევნო გარემოზე, მოცემული ვითარება კი უფრო მძიმედ აისახება მასზე. კიდევ ერთხელ მოვუწოდებთ პოლიტიკურ ძალებს, თავი შეიკავონ დაპირისპირებისაგან და მით უმეტეს, ძალადობისაგან. აღნიშნულ შემთხვევაზე კი დროულად და მკაცრად უნდა მოხდეს რეაგირება, რათა ერთის მხრივ, სამართალდამრღვევმა პირებმა იგრძნონ პასუხისმგებლობა, მეორეს მხრივ კი, მოხდეს ძალადობის პრევენცია და უზრუნველყოფილი იყოს სამართლიანი, თანაბარი და მშვიდი საარჩევნო პროცესები”, – ნათქვამია განცხადებაში, რომელიც მომზადდაარასამთავრობო ორგანიზაციების „საუნჯე”, „სამოქალაქო საზოგადოების განვითარების ცენტრის (CSDC)”, „ნაბიჯი სამოქალაქო ინტეგრაციისაკენ” და „ჰელფინგ ჰენდის” მიერ პროექტის „ახალგაზრდული სადამკვირვებლო მისია“ ფარგლებში.