თბილისში, ცოტნე დადიანის ქუჩაზე აფეთქება მოხდა. წინასწარი ინფორმაციით, საცხოვრებელი კორპუსის ერთ-ერთ ბინაში გაზი აფეთქდა, რამაც კედლის ნგრევა გამოიწვია.
შსს-ს საგანგებო სიტუაციების მართვის სააგენტოში აცხადებენ, რომ შემთხვევის შედეგად მსუბუქად დაშავდა ერთი ადამიანი. იგი საავადმყოფოშია გადაყვანილი.
შემთხვევის ადგილზე შსს-ს საგანგებო სიტუაციების მართვის სააგენტოს ერთი ბრიგადა იყო მობილიზებული. მომხდარის დეტალებს გამოძიება ადგენს.