აფხაზური მედიის ცნობით, წუხელ გვიან ღამით ტყვეობიდან გაათავისუფლეს პარტია ,,ედინაია აბხაზიას’’ პოლიტსაბჭოს მდივანი ირინა დოჩია, რომელიც 2 ივლისს საკუთარი სახლის ეზოდან გაიტაცეს უცნობმა პირებმა და ერთ თვეზე მეტხანს უკვალოდ იყო გამქრალი.
დე ფაქტო აფხაზეთის უშიშროების კომიტეტის ოფიციალური ინფორმაციით, გათავისუფლება მოხდა აფხაზური და რუსეთის სპეცსამსახურების ერთობლივი ძალისხმევით ისე, რომ არ გადაუხდიათ გამოსასყიდი, რომელსაც გამტაცებლები ითხოვდნენ – 1,5 მილიონი ევრო.
თუ რა სახის ღონისძიება გატარდა გამტაცებელთა დაკავებისთვის არ ხმაურდება.
ირინა დოჩიას გათავისუფლება ტყვეობიდან მოულოდნელი აღმოჩნდა აფხაზეთის მოსახლეობისათვის, რადგან ჯერ კიდევ გუშინ რაულ ხაჯიმბამ დააწესა ფულადი ჯილდო ( 1 მილიონი რუბლი) იმ პირისათვის, ვინც შესაბამის ორგანოებს მიაწვდიდა ინფორმაციას გატაცებულის ადგილსამყოფელის შესახებ.