ზუგდიდელი ექიმის მალხაზ ჯალაღონიას გამარჯვებამ ,,ნიუ იორკ თაიმსის’’ სამედიცინო ვიქტორინაში გააძლიერა ინტერესი ამ კონკურსის მიმართ.
ვიქტორინაში ჩართვის მსურველებმა უნდა ნახონ New York Times- ის რუბრიკა THINK LIKE A DOCTOR, რომელშიც იშვიათი სამედიცო შემთხვევების შესახებ ინფორმაცია, ხოლო ქვერუბრიკაში ,,დიაგნოსტიკა'' პერიოდულად განახლებადი სამედიცინო თავსატეხებია განთავსებული. რუბრიკის ავტორია აშშს – სა და მის ფარგლებს გარეთ ფართოდ ცნობილი ექიმი ლიზა სანდერსი, რომელიც სვამს კითხვებს, რომელზედაც პასუხი უნდა გასცენ მკითხველებმა.
რუბრიკა მრავალი წელია არსებობს, იგი თავად ლიზა სანდერსის შეთავაზებაა გამოცემისთვის.
ლიზა სანდერსი იელის საავადმყოფოს ექიმია, ცნობილი თავისი სპეციალიზაციით გამოუცნობი და ჩახლართული სამედიცინო შემთხვევების სფეროში.
როგორც ერთ-ერთ ინტერვიუში ამბობს, ამ რუბრიკის იდეა მას დაებადა მას შემდეგ, რაც პრაქტიკაში დაუგროვდა სამედიცინო შემთხვევები, როცა პრობლემის გადაწყვეტას სჭირდებოდა ინტუიცია, არაორდინალური ხედვა და მოწყვეტაც კი თეორიისა და პრაქტიკისაგან, რომელიც შტამპავს უმაღლესი პროფესიული ნიშან- თვისებების მატარებელ ადამიანსაც კი.
,, არსებობს გარკვეული სიმპტომები, რომელნიც ძნელად ექვემდებარება ახსნას, და დაავადებები, რომელთა წინაშე მეცნიერება და ტექნოლოგია უძლურია. აქ აუცილებლად უნდა ჩაერთოს შემოქმედის ინტუიცია. ექიმი, რომელსაც არავინ იცნობს და მოკლებულია რეგალიებს, სწორედ ამ ინტუიციის წყალობითა და ძველი თეორიის ბალასტისგან თავისუფალი გონებით უფრო აგნებს დაავადების ჭეშმარიტ მიზეზს, სვამს უზუსტეს დიაგნოზს და პოულობს განკურნების საშუალებას. ამ შესაძლებლობის დაკარგვა არ შეიძლება. ასეთი ადამიანების პოვნა მხოლოდ წაადგება მედიცინის განვითარებას. მაგრამ როგორ ვიპოვოთ ისინი? საგაზეთო განცხადების მეშვეობით? რატომაც არა? .- ვთქვი მე, – ვცადოთ ვიქტორინა , სამედიცინო თავსატეხებზე და გამოცანებზე აგებული ვიქტორინა , იქნებ გამოგვეხმაურონ ცინცხალი ტვინები? ამასთან ეს სახალისოც არის, კრავს ექიმების ოჯახს, აფართოებს კონტაქტებს. ასე გაჩნდა ეს ვიქტორინა გაზეთში და გამოჩენისთანავე დიდძალი გამოხმაურება მოჰყვა მსოფლიოს სხვადასხვა კუთხიდან. ‘’
საინტერესოა, რომ სწორედ ამ რუბრიკამ მისცა ბიძგი მსოფლიოს მრავალ ქვეყანაში და მათ შორის საქართველოშიც ძალზე პოპულარული სერიალის ,,დოქტორ ჰაუსის’’ შექმნის იდეას, რომელიც ლიზა სანდერსის შეთავაზებითა და კონსულტანტობით არის გადაღებული.
არავინ იცის, აიყვანდა თუ არა ერთობ უხიაგი დოქტორი ჰაუსი მალხაზ ჯალაღონიას თავის გუნდში, მაგრამ ,,დედამისი'' ლიზა სანდერსი ალბათ კი, რადგან კონკურსის უამრავ მონაწილეს შორის არჩევანი მასზე შეაჩერა.