შეიძლება მივიღოთ სურათი, რომ „ქართული ოცნება“ იყოს ძალიან ფართოდ წარმოდგენილი პარლამენტში, – ამის შესახებ ექსპერტმა რამაზ საყვარელიძემ დღეს გამართულ პრესკონფერენციაზე განაცხადა. მისი თქმით, “ქართული ოცნების“ ფართოდ წარმოდგენის მიზეზი სხვა პარტიების პასიურობაა. „შეიძლება მივიღოთ სურათი, რომ „ქართული ოცნება“ იყოს ძალიან ფართოდ წარმოდგენილი, რადგან სხვა პარტიების პასიურობამ ითამაშოს გადამწყვეტი როლი“, – განაცხადა რამაზ საყვარელიძემ. მისი თქმით, პარტიების პასიურობის მიზეზი ხშირად ფინანსებია ხოლმე და შესაძლებელია, რომ პარტიებმა აქტიურობა სექტემბრისთვის გადადონ.„თუ ყველა პარტია ერთდროულად აყაყანდება სექტემბერში, ვერავინ ვერ გაიგებს რომელი პარტია რა არის“, – განაცხადა რამაზ საყვარელიძემ. საყვარელიძის თქმით, „ქართულ ოცნებასთან“ ერთად პარლამენტში მოხვდებიან “ნაციონალებიც”, რადგან მათ საკმაოდ მობილიზებული ელექტორატი ჰყავს. მისივე თქმით, მანდატების აღებას „პატრიოტთა ალიანსიც“ შეძლებს. როგორც საყვარელიძე აღნიშნავს, ელექტორატის მობილიზაცია გადამწყვეტ როლს ითამაშებს არჩევნებში. ის ასევე არ გამორიცხავს პარლამენტში პაატა ბურჭულაძისა და ნინო ბურჯანაძის პარტიების მოხვედრას. თუმცა, მისი თქმით, ნინო ბურჯანაძეს უფრო მეტი შანსი აქვს. „ბურჭულაძის პარტიამ ადრე აიხადა ნიღაბი და განაცხადა, რომ “ნაციონალების” მხარდამჭერია“, – განაცხადა რამაზ საყვარელიძემ.
რამაზ საყვარელიძე – თუ ყველა პარტია სექტემბერში ერთდროულად აყაყანდება, ვერავინ გაიგებს, რომელი პარტია რა არის
Published on