საკონსტიტუციო სასამართლოში გიგი უგულავასა და ე.წ. კაბელების საქმეზე გაერთიანებული სარჩელის განხილვა განახლდა.
მოსარჩელეების დავა ეხება სისხლის სამართლის კოდექსის 182-ე მუხლს, რომელიც გაფლანგვას გულისხმობს.
გიგი უგულავას ადვოკატს მიაჩნია, რომ მოქმედი მუხლი არ არის მკაფიო და ის შეიძლება, კანონიერად გახარჯული თანხის შემთხვევაშიც იყოს გამოყენებული პოლიტიკური ან სხვა რაიმე დატვირთვის მქონე საქმეების განხილვის დროს ამა თუ იმ ადამიანის დასაპატიმრებლად.
ე.წ. კაბელების საქმეში ბრალდებულთა ადვოკატი სოსო ბარათაშვილი კი ამბობს, რომ მუხლს აკლია განმარტებები.
ადვოკატების პოზიციას არ იზიარებს პარლამენტის იურისტი. მას მიჩანია, რომ მუხლი არ არის ბუნდოვანი.
არ არის გამორიცხული, საკონსტიტუციო სასამართლომ განხილვები განუსაზღვრელი ვადით გადადოს, ამისათვის პლენუმის 5 მოსამართლის თანხმობა არის საჭირო.
დღევანდელი სხდომა მედიისა და საზოგადოების განსაკუთრებულიყურადღების ცენტრშია საკონსტიტუციო სასამართლოს თავმჯდომარის გიორგი პაპუაშვილის მიერ ამ დღეებში გაკეთებული სკანდალური განცხადების ფონზე, რომელშიც იგი მოსამართლეებზე განხორციელებულ ზეწოლაზე, მუქარასა და შანტაჟზე ისაუბრა.
„ბოლო პერიოდის განმავლობაში მიმდინარეობს მიზანმიმართული ზეწოლა მოსამართლეებზე, რაც გამოიხატება მათზე თვალთვალში, მათ კომერციულ საქმეებზე ზეწოლაში დაშანტაჟებაში, რომ მათი ახლო ნათესავები დაკავებული იქნებიან სხვადასხვა საბაბით, აგრეთვე პირადი ინფორმაციის ხასიათის, ფალსიფიცირებული, მაგრამ ინფორმაცია შეიძლება გასაჯაროვდეს. ყველა ეს საქმე დაკავშირებულია მაღალი საზოგადოებრივი ინტერესის მქონე საქმეებთან, რომელიც განიხილება სასამართლოში და მიმართულია იმისაკენ, რომ მათ გადაწყვეტილება მიიღონ ან ხელისუფლების სასარგებლოდ ან მაქსიმალურად გააჭიანურონ გადაწყვეტილების მიღების პროცესი,“-აცხადებს პაპუაშვილი.