ერთიანი ნაციონალური მოძრაობის წევრებმა დღეს ქალაქ ზუგდიდის საგანგებო სიტუაციების მართვის და სახანძრო სამაშველო სამსახურის დაუსრულებელ შენობასთან აქცია გამართეს.
მუნიციპალიტეტის საკრებულოს ფრაქციის წევრმა ანი წითლიძემ მედიისთვის გაკეთებულ განცხადებაში განმარტა, რომ შენობის პროექტის განხორციელება წინა ხელისუფლების დროს, 2012 წელს დაიწყო, მშენებლობის ორივე ეტაპის თანხის ნაწილი (ძირითადი სამუშაოები) გათვალისწინებულიიყო ადგილობრივ ბიუჯეტში, მაგრამ ხელისუფლებაში ,,ქართული ოცნების'' მოსვლის შემდეგ, 2013 წელს , ჯერ კიდევ ზუგდიდის მუნიციპალიტეტის გამგეობის პირობებში მშენებლობა შეჩერდა .
2014 წელს ახალი მოწვევის საკრებულომ შენობა შს სამინისტროს გადასცა. უცნობია, სად წავიდა თანხები, რომელიც ადგილობრივი ბიუჯეტიდან ამ შენობის მშენებლობისთვის ადგილობრივმა თვითმმართველობამ სამინისტროს მშენებარე ნაგებობასთან ერთად გადასცა (სავარაუდოდ, პროექტისთვის განკუთნილი თანხა პრემიებზე, ხელფასებზე და დანამატებზე დაიხარჯა ).
უცნობია, რატომ შეჩერდა სამშენებლო სამუშაოები და რა ბედი ეწევა შენობას. ფაქტია, რომ მშენებლობა შეჩერებულია და ლამის სანაგვედ იქცა.
ნაციონალური მოძრაობის ბრალდებს მერიაში აბსურდულს უწოდებენ, მერიის პრესამსახურის უფროსი მაია ღუბელაძის თქმით, მათი ბრალდებები სიმართლეს არ შეესაბამება და აქციის მონაწილეთა მიერ ზუგდიდის მერიის მიმართ დასმული შეკითხვები შინაგან საქმეტა სამინისტროზე უნდა გადამისამართდეს.