ფოთის მერია უარყოფს  „ნაციონალური მოძრაობის“ განცხადებას იმის შესახებ, რომ ნანა ალექსანდრიას სახელობის საჭადრაკო  ფესტივალს სახელი გადაარქვეს პოლიტიკური კონიუნქტურიდან გამომდინარე და ამტკიცებს, რომ ეს მხოლოდ  და მხოლოდ ფოთის სახელის პოპულარიზაციის მიზნით მოხდა,  თუმცა ვერ ხსნის, რა სირთულეს წარმოადგენდა ფესტივალს შემდგომშიც ეტარებინა ნანა ალექსანდრიას სახელობის ფოთის საერთაშორისო  საჭადრაკო ფესტივალის სახელი. ამ ლოგიკით, შესაძლოა ყველა სხვა სახელობითი მუსიკალური ფესტივალის, სპორტული ტურნირისა და თვით უნივერსიტეტების  სახელწოდებებიდანაც კი გაქრეს მათი   დამფუძნებლების სახელი, რისი მაგალითებიც, სამწუხაროდ, ბევრი გვაქვს საქართველოს ახლო წარსულში. 

მერიის კონიუნქტურული მიდგომების არსს ვერ ცვლის და საზოგადოების მძაფრ რეაქციას მის ამ გადაწყვეტილებაზე ვერ გაანელებს იმ ფაქტის მოშველიება, რომ, როგორც ადმინისტრაციაში განმარტავენ,   ,,ცვლილებები  ქალბატონ ნანასთან  შეთანხმებით მოხდა''.

ნანა ალექსანდრია, რომელსაც მსოფლიო საჭადრაკო სამყარო იცნობს როგორც ,,პოეტს ჭადრაკში'', ,,მოცარტს ჭადრაკში''  თამაშის სტილითა და პიროვნული, მიამიტობამდე მისული არამერკანტილური ცხოვრების წესით, ის პიროვნება არ არის, რომ სახელსა და დიდებას ჩაებღაუჭოს, მით უფრო, რომ მას ისეთი კვალი აქვს გავლებული საქართველოს, მსოფლიოს  საჭადრაკო ცხოვრებაში, რომ მის რეგალიებს რაიმე განსაკუთრებულს ვერ შესძენს, ერქმევა თუ არა ამ ფესტივალს მისი სახელი. ეს ფოთს უფრო სჭირდებოდა.

,, ნუთუ სოლოლაკიდან  მობერილი  კონიუნქტურული სიო უფრო ძლიერია , ვიდრე შავი ზღვიდან მოვარდნილი ქარიშხლები და შტორმი , რომლებიც ათასეული წლებია ფოთს უტევს, მაგრამ   ვერაფერი დააკლო,? '' – წერენ მოქალაქეები სოციალურ ქსელებში.