მწიფდება სკანდალი, რომელშიც შესაძლოა, საქართველოს მთავარი პროკურატურა აღმოჩნდეს გარეული.
საქართველოს შეიარაღებული ძალების გენერალური შტაბის ყოფილი უფროსი გიგი კალანდაძე აცხადებს, რომ საქართველოს მთავარმა პროკურატურამ საქართველოს თავდაცვის სამინისტროს სამხედრო პოლიციაში მომუშავე პირების შესახებ პერსონალური მონაცემები და მათი საქმიანობის შესახებ ინფორმაცია რუსეთის მთავარ პროკურატურას გადაუგზავნა. საუბარია იმ პირებზე, რომლებიც 2008 წლის აგვისტოს ომის შემდეგ სამხედრო პოლიციაში მუშაობდნენ. გენერლის თქმით, საქართველოს მთავარმა პროკურატურამ რუსეთს საიდუმლო მასალები მოსკოვში გენერალ დუბაძის მკვლეობის საქმის ძიების ფარგლებში მიაწოდა. ასეთივე ინფორმაციას ავრცელებს ადვოკატი რომეო საჯაია, რომელიც ამბობს, რომ ეს მასალები რუსეთის პროკურატურამ გამოითხოვა.
საქართველოს მთავარი პროკურატურის საზოგადოებასთან ურთიერთობის დეპარტამენტი პასუხად აცხადებს, რომ ინფორმაციის გაცვლის ფაქტი ოფიციალურად არ დასტურდება. თუმცა, დეტალურ ინფორმაციას ვერ გასცემს, რადგან გენერალ დუმბაძის მკვლელობის საქმეს ადევს გრიფი საიდუმლო.
შეგახსენებთ, რომ გენერალ-მაიორ რომან დუმბაძის განზრახ ჯგუფურად მკვლელობის შეკვეთის ფაქტზე, საქართველოს სახელმწიფო უსაფრთხოების სამსახურმა 2016 წლის 7 აპრილს ბრალი თავდაცვის სამინისტროს სამხედრო პოლიციის დეპარტამენტის ყოფილ უფროსის მეგის ქარდავა წაუყენა.სუს-ის ინფორმაციით, გამოძიებით დადგენილია, რომ მეგის ქარდავა შუამავლის მეშვეობით რუსეთის ფედერაციაში, ქ. მოსკოვში მოქმედ კრიმინალურ დაჯგუფებას დაუკავშირდა და რომან დუმბაძის მკვლელობა შეუკვეთა. 2012 წლის 21 მაისს, ქ. მოსკოვში ოთხკაციანმა ჯგუფმა აღნიშნული მკვლელობა გარკვეული თანხის სანაცვლოდ განახორციელა. ოთხივე პირი სასჯელს რუსეთის ფედერაციაში იხდის, ხოლო შუამავალი საქართველოში იქნა დაკავებული და იგი სასამართლომ დამნაშავედ სცნო.