ქართველი პოლიტიკოსები გიგა ოთხოზორიას მკვლელობაში ბრალდებული რაშიდ კანჯი ოღლისთვის შინაპატიმრობის შეფარდებას ეხმაურებიან .
"შინაპატიმრობის გამოყენება საზოგადოების დაცინვაა,“- ასე შეაფასა სახალხო დამცველმა უჩა ნანუაშვილმა აფხაზეთის სასამართლოს გადაწყვეტილება.
,,ქართულ ოცნებაში'' აფხაზეთის დე ფაქტო ხელისუფლებას მოუწოდებენ ბრალდებული საქართველოს გადმოსცენ.
"ოთხოზორიას მკვლელობაში ეჭვმიტანილისთვის შინაპატიმრობის შეფარდება ქართული მხარისთვის არადამაკმაყოფილებელია, მოვუწოდებთ აფხაზეთის დე ფაქტო ხელისუფლებას, რომ ეს პირი გადმოსცეს ქართულ მხარეს და იმ ქვეყნის წესების მიხედვით მოხდეს მისი გასამართლება, სადაც მან დანაშაული ჩაიდინა,"- განაცხადა ელისო ჩაფიძემ.
ფრაქცია ქართული ოცნების თავმჯდომარე, გიორგი ვოლსკი იმედოვნებს, რომ დე ფაქტო ხელისუფლება ეცდება სახე და სახელმწიფოებრიობის თაობაზე მითი შეინარჩუნოს. – „ამ ადამიანმა ახალგაზრდა კაცი გამოასალმა სიცოცხლეს და სათანადო სასჯელს იმსახურებს,“- განაცხადამან.
ეროვნული ფორუმის წევრი ანი მიროტაძეც, მკვლელობაში ბრალდებულისთვის შინა პატიმრობის შეფარდებას არაადეკვატურს უწოდებს და მისი დასჯის აუცილებლობაზე საუბრობს.
„ცინიკურია, თავზე ხელაღებული გადაწყვეტილებაა, ვინაიდან საქმე ეხება ახალგაზრდა ადამიანის მკვლელობას და მკვლელობას არ აქვს ეროვნება. ის ადამიანი, ვინც მსგავსი ტიპის სისასტიკით ჩაიდინა ეს მკვლელობა, არის დასასჯელი და ნორმა, რომელიც მას მიუსაჯეს, აბსოლუტრად არაადეკვატურია,“ – განაცხადა ანი მიროტაძემ.
ნაციონალური მოძრაობის წევრი თინათინ ბოკუჩავა გიგა ოთხოზორას მკვლელობაში ბრალდებულისთვის შინა პატიმრობის შეფარდებას ხელისუფლების არასწორ პოლიტიკას უკავშირებს.
„ეს არის უკიდურესი ცინიზმი და უსამართლობა, რომ გიგა ოთხოზორიას მკვლელი, ოკუპირებული აფხაზეთის დე ფაქტო სასამართლომ მხოლოდ შინა პატიმრობით დასაჯა. ეს არის პირდაპირ, იმის შედეგი, რომ დღევანდელი ხელისუფლება არასწორ პოლიტიკას ატარებს რუსეთთან. მათ არ ესმით, რომ რუსეთთან საჭიროა, მშვიდობიანი, მაგრამ ძალიან პრინციპული მიდგომა,“ – განაცხადა თინათინ ბოკუჩავამ.