ევროსასამართლო საქმეზე ივანე მერაბიშვილი საქართველოს წინააღმდეგ განცხადებას 14 ივნისს გამოქვეყნებს, როგორც "აიპრესთან" "ნაციონალური მოძრაობის" წევრი სერგო რატიანი აცხადებს, ევროსასამართლოს შეფასება იქნება ადექვატური და სამართლიანი, რომ ვანო მერაბიშვილი ნამდვილადაა პოლიტიკური პატიმარი და იმედოვნებს, რომ ამ შეფასება საქართველოს ხელისუფლება გაითვალისწინებს.
„ვიმედოვნებ, რომ ევროსასამართლოს აქვს მიღებული ადექვატური და სამართლიანი გადაწყვეტილება, იმასთან დაკავშირებით რომ ვანო მერაბიშვილი არის პოლიტიკური პატიმარი. მე მაქვს ასეთი მოლოდინი.
თუ კი ევროსასამართლო ასეთ შეფასებას გააკეთებს საქართველოს ხელისუფლებამ უნდა იხელმძღვანელოს ამით“,-განაცხად სერგო რატიანმა.
იუსტიციის მინისტრის თეა წულუკიანის განცხადებით, ვანო მერაბიშვილის გათავისუფლებაზე სტრასბურგის სასამართლოს გადაწყვეტილება ვერ იმოქმედებს, რადგან, მინისტრის განმარტებით, მერაბიშვილი არ იმყოფება წინასწარ პატიმრობაში, არამედ ის სასჯელს იხდის და მისი ვადაზე ადრე გათავისუფლება არ იგეგმება.
„ჩვენ არ ჩაგვითვლია, რომ ვანო მერაბიშვილის საქმე არის რაიმე არაჩვეულებრივი, ან ისეთი ექსტრაორდინალური, რომელიც მოითხოვდა ზეპირი განხილვის მოთხოვნას სტრასბურგში, ეს არის ერთი რიგითი პატიმრის რიგითი საჩივარი, ამიტომ, მე არ მომითხოვია ზეპირი განხილვა, ეს იქნებოდა რესურსის ზედმეტი ხარჯვა.
ხვალ გამოდის გადაწყვეტილება. არ ვიცით, რა თქმა უნდა, წინასწარ, რა იქნება გადაწყვეტილებაში, მაგრამ რაც არ უნდა იყოს, ვანო მერაბიშვილი, როგორც სხვა პატიმრები, მისი პოლიტიკური გუნდიდან, რამდენიმე მათგანი ახლა უკვე აღარ არის, წინასწარ პატიმრობაში, ისინი იხდიან სასჯელს და კონკრეტულად ბატონი ვანო მერაბიშვილის შემთხვევაში არ იგეგმება მისი ვადამდე ადრე გათავისუფლება. აქედან გამომდინარე, ამაზე ხვალინდელი გადაწყვეტილება, როგორიც არ უნდა იყოს ის, ვერ იმოქმედებს”, – აღნიშნა წულუკიანმა.