დასრულდა ქვესადგურ ,,ხორგას'' მშენებლობა ხობის მუნიციპალიტეტის სოფელ ახალსოფელში .

 ქვესადგურის  სიმძლავრე 220/110კვ,  რაც გააძლიერებს დასავლეთ რეგიონის უმნიშვნელოვანეს კვანძს „ვარდნილჰესი-ზუგდიდი-მენჯი-ხორგა-ფოთი-ბათუმი“, კერძოდ ხელს შეუწყობს ელექტროენერგიის გადაცემის სიმძლავრის გაზრდას, პერსპექტივაში ასაშენებელი ჰიდროელექტროსადგურებიდან ახალი სიმძლავრეების გატარებას, ფოთის ინდუსტრიული ზონისთვის დამატებითი სიმძლავრის უწყვეტ მიწოდებას, საექსპორტო ბაზრებთან დაკავშირებას და საშუალებას მისცემს ქვეყანას გაზარდოს ელექტროენერგიის ექსპორტი თურქეთში.

ახალი ვესადგურის მშენებლობა 2015 წლის ივლისში დაიწყო საქართველოს სახელმწიფო ელექტროსისტემის  „რეგიონალური ელექტროგადაცემის გაუმჯობესების პროექტის“ ფარგლებში, პროექტი განხორციელდა აზიის განვითარების ბანკის ფინანსური მხარდაჭერით. მისი ღირებულება თითქმის 12 მილიონი ევროა. სამშენებლო სამუშაოებს ავსტრიული კომპანია აწარმოებდა. მშენებლობაზე დასაქმებული იყო ადგილობრივი მოსახლეობა.

ქვესადგურის გახსნის საზეიმო ცერემონიას დაესწრნენ საქართველოს ვიცე-პრემიერი, ენერგეტიკის მინისტრი კახა კალაძე, საქართველოს სახელმწიფო ელექტროსისტემის რეაბილიტაციის მმართველი სულხან ზუმბურიძე, საქართველოში „აზიის განვითარების ბანკის“ მუდმივი წარმომადგენლობის დირექტორი (ADB) იეშიმ ელჰან-კაიალარი და სამეგრელო – ზემო სვანეთის გუბერნატორის მოადგილე კახაბერ რუსია.

„მსგავსი პროექტების განხორციელებით საქართველო თავის რეგიონულ თუ საერთაშორისო მნიშვნელობის ფუნქციას და დანიშნულებას უბრუნდება, ჩვენ ვიყავით და კვლავაც ვხდებით სატრანზიტო ხიდი,დერეფანი ევროპასა და აზიას შორის. საქართველოზე გადის მნიშვნელოვანი საერთაშორისო პროექტების ინტერესები და ეს   ქვეყნის სწრაფად ფეხზე დადგომის, მისი უსაფრთხოების საწინდარია. ”-განაცხადა კახა კალაძემ.