საქართველოს სახალხო დამცველი უჩა ნანუაშვილი წალენჯიხისა და მარტვილის სოფლებში მოსახლეობას შეხვდა.
სახალხო დამცველის აპარატის მიერ გავრცელებული ინფორმაციით, ომბუდსმენი გაეცნო სოფლად არსებულ საზოგადო სოციალურ პრობლემებსა და კონკრეტულ საკითხებს , რომელიც ადგილობრივ მოსახლეობას აწუხებს. სამეგრელოში მოსახლეობის ძირითად პრობლემას სოციალური საკითხები, ინფრასტრუქტურის გაუმართაობა წარმოადგენს. კერძოდ, შეჩერებულია გაზიფიცირება, მოუგვარებელია ეკომიგრანტებისა და დევნილთა განსახლების საკითხი, მძიმეა სოციალურად დაუცველთა მდგომარეობა; მოსახლეობა ნაპირსამაგრი სამუშაოების წარმართვას ითხოვს; მუნიციპალიტეტის სოფლების ამბულატორიების უმრავლესობაში პრობლემურია მედიკამენტებით მომარაგების საკითხი; გადაუდებელ შემთხვევებში ექიმები წამლების საკუთარი ხელფასით იძენენ. მოუწესრიგებელი გზების გამო გვიანდება სასწრაფო სამედიცინო მომსახურება და ავადმყოფის ტრანსპორტირება; ასევე, წალენჯიხისა და მარტვილის მუნიციპალიტეტის სკოლები და ბაღები მეტწილად რეაბილიტაციას საჭიროებს. საგანმანათლებლო და სააღმზრდელო დაწესებულებების შიდა ინფრასტრუქტურა მოუწესრიგებელია. რიგ სკოლებში სპორტული დარბაზები არ ფუნქციონირებს, ნაწილში კი არ არის სპორტული ინვენტარი.
სახალხო დამცველს განცხადებით, წალენჯიხის რაიონის მცხოვრებმა პირებმა მიმართეს, რომელთა სამოსახლოზეც ჯვარი-ხორგას დამაკავშირებელი მაღალი ძაბვის ელექტროგადამცემი ანძების დამონტაჟება მიმდინარეობს. მოსახლეობის განცხადებით, თხოვნის მიუხედავად, მშენებლობის განმახორციელებელი კომპანია ანძების ჯანმრთელობაზე ზემოქმედების საფრთხის შესახებ მათ ინფორმაციას არ აწვდის. მოსახლეობა ვერც სათანადო კომპენსაციას იღებს.