მთავარი პროკურორის ირაკლი შოთაძის განცხადებამ , რომ კორცხელის ინციდენტთან დაკავშირებით დაიკითხებიან ნიკა მელია და გიგა ბოკერია, ხოლო კახი კალაძე – არა, პოლიტიკურ წრეებსა და საზოგადოებაში გარკვეული კითხვები ( მათ შორის რიტორიკულიც) წარმოშვა.
ამ კითხვების პასუხად ვიცე პრემიერმა დიმიტრი ქუმსიშვილმა განაცხადა, რომ შოთაძეს აქვს ,,სრული კომპეტენცია და ცოდნა ვინ დაკითხოს და ვინ – არა, ამიტომ არ აპირებს მის კომპეტენციაში შესვლას''
შეგახსენებთ, ”ერთიანი ნაციონალური მოძრაობა” ითხოვს, სოფელ კორცხელის ინციდენტთან დაკავშირებით პოლიტიკური პასუხისმგებლობა კახა კალაძემ აიღოს. შესაბამისი განცხადება სერგო რატიანმა გააკეთა. მისი თქმით, ”იმ დღეს ვითარება კალაძეს მიყავდა”.
”ჩვენ ვხედავთ, რომ არავინაა დაკავებული. საერთოდ არ არის საუბარი შემკვეთებზე. შემსრულებლები ყველანი ღია ეთერით ვიხილეთ. ვნახეთ, რომ დამნაშავე პირები აქეთ აყენებენ ულტიმატუმს, რომ დაკავების შემთხვევაში, საპროტესტო აქციებს დაიწყებენ. ვიდრე არ იქნება საუბარი დამკვეთზე, ვიდრე მთავრობასა და უმრავლესობაში არ იქნება ნება იმისა, რომ პოლიტიკური პასუხისმგებლობა დაეკისროს მას, ვინც ეს ინციდენტი დაუკვეთა, მანამ დამნაშავეები ულტიმატუმის ფორმით ისაუბრებენ”, – განაცხადა რატიანმა.