ივანე ჯავახიშვილის სახელობის თბილისის სახელმწიფო უნივერსიტეტში ახლახან დასრულდა სხვადასხვა უმაღლესი სასწავლებლების რექტორებისა და სტუდენტების შეხვედრა, რომელიც ფორმალურად "განათლების შესახებ" კანონში დაგეგმილ ცვლილებებს ეძრვნება, მაგრამ ფაქტობრივად სინამდვილეში უნივერსიტეტებში სტუდენტური თვითმმართველობების გაუქმების საკითხზე მწვავე დისკუსიაში გადაიზარდა, დარბაზი დემონსტრატიულად დატოვა უნივერსიტეტის თვითმმართველობის წარმომადგენელმა. განათლების მინისტრს თამარ სანიკიძეს უკმაყოფილო სტუდენტების მწვავე კითხვებზე მოუხდა პასუხის გაცემა, თუმცა შეხვედრა ისე დასრულდა, რომ მათ ვერ მიიღეს პასუხი კითხვაზე – გაუქმდება თუ არა სტუდენტური თვითმმართველობა და თუ არ გაუქმდება, რა სახით და რა წესით იმოქმედებს იგი.
მინისტრის თქმით, გარდამავალ პერიოდში, რომელიც დაახლოებით ერთ წელს გაგრძელდება, შემუშავდება თვითმმართველობების მუშაობის დროებითი წესი და ამ წესს უკვე უმაღლესი სასწავლებლის ხელმძღვანელობა მიიღებს .
„თავიდანვე იყო პრინციპული შეთანხმება იმაზე, რომ, რადგან ჩვენ არ გვაქვს დღეს ჩამოყალიბებული საუკეთესო მოდელი და, რომელსაც მართლაც სჭირდება მსჯელობა, გადავიტანთ ყველაფერს გარდამავალ პერიოდში გარკვეული ფუნქციებით, გარკვეული თამაშის წესების დაწესებით და სამორატორიუმო პერიოდით. შესაბამისად, მოგვეცემოდა საშუალება, გვემსჯელა ამ მოდელებზე,“ – განმარტა თამარ სანიკიძემ.