ზუგდიდის საოლქო სააარჩევნო კომისიაში კორცხელში ჩატარებული კენჭისყრის შედეგების გადამოწმება მიმდინარეობს, კომისიამ ხმაურიანი სხდომის შემდეგ ხმების ხელახალი გადათვლის გადაწყვეტილება მიიღო.
"კორცხელში, საარჩევნო უბნებზე კენჭისყრა დაძაბულ, სტრესულ ვითარებაში მიმდინარეობდა, რაც გამოწვეული იყო უბნის გარეთ დაპირისპირებული ჯგუფების დიდი რაოდენობით მობილიზებით. იმის გამო, რომ საუბნო საარჩევნო კომისიის წევრები იმყოფებოდნენ უბნის შიგნით მყოფი წარმომადგენლების და დამკვირვებლების გავლენის ქვეშ, ხმის დათვლის პროცესი ხარვეზებით წარიმართა. დაძაბულობისა და შეცდომების გამო, რამდენჯერმე გადათვალეს ბიულეტენები და 53-ე უბანზე ხელმოწერების რაოდენობა ნაკლები აღმოჩნდა ბიულეტენების რაოდენობაზე". – აცხადებენ ქართული ოცნების წარმომადგენლები.
ერთიანი ნაციონალური მოძრაობის წევრმა აკაკი ბობოხიძემ ჟურნალისტების ყურადღება გაამახვილა საარჩევნო კომისიის თავჯდომარის მიერ შუალედური არჩევნების დღეს, 22 მაისსავე გაკეთებულ განცხადებაზე, რომ საარჩევნო უბნების გარეპერიმეტრზე მომხდარ არეულობას არჩევნების შედეგებზე გავლენა არ მოუხდენია. სხდომის დაწყების წინ მან ჟურნალისტებთან საუბარში განაცხადა შემდეგი: ვნახოთ, ცენტრალური კომისიის თავჯდომარის გუშინდელი პოზიცია და დღეს ცენტრალური კომისიის გადაწყვეტილება რამდენად დაემთხვევა ერთმანეთს. გამოჩნდება, მიიღო თუ არა ახალი დავალება ცენტრალურმა საარჩევნო კომისიამ იმ ადამიანებისგან, ვინც რეალურად მართავს ქვეყანას", – განაცხადა ბობოხიძემ.
სხდომის დაწყებამდე განცხადება გააკეთა ,,ქართული ოცნების''წარმომადგენელმა ირაკლი კობახიძემაც: "პირველმა და მეორე გადათვლამ შედეგი არ აჩვენა, მესამე შედეგის დროს იყო პრინციპული სხვაობა, რამაც გააჩინა სწორედ ეჭვები და კითხვის ნიშნები, რის გამოც მოვითხოვეთ ჩვენ გადათვლა საოლქო კომისიაში. მას შემდეგ, რაც დასრულდება ეს პროცედურა, ბუნებრივია ჩვენ ვაღიარებთ იმ შედეგს, რომელიც დაითვლება".
როგორც ჩანს დავალება მიღებულია. საოლქო კომისიამ ხელახალი დათვლის გადაწყვეტილება მიიღო.
კომისიის ოფისთან შეკრებილი ადამიანები აცხადებენ, რომ არ დაუშვებენ შედეგების გაყალბებას, მათ საფუძვლიან ეჭვებს აღუძრავს სხდომიდან ნაციონალური მოძრაობის წარმომადგენლის გაძევება კომისიის მიერ და მის გარეშე მიღებული გადაწყვეტილება.
,,რამდენჯერ დაითვლით ბიულეტენებს?! ეს რამეს გიშველით ან ახლა, ან 8 ოქტომბერს?! მოგებული არჩევნების წართმევას ცდილობთ თავხედურად და მაგრები ხართ'' – აცხადებს ზუგდიდის საკრებულოს წევრი ანი წითლიძე.
,,ცირკია, რაც საოლქო საარჩევნო კომისიაში ამ წუთებში ხდება '' – წერს სოციალურ ქსელში საკრებულოს წევრი ბათლომე შელია.
,,გულუბრყვილობა იქნებოდა გვეფიქრა, რომ ,,ქართული ოცნების" ხელისუფლება მარტოდენ კუნთმაგარი ბიჭების იმედზე დარჩებოდა'' – აცხადებენ ენმ – ს კანდიდატის მხრდამჭერები, რომელნიც კორცხელიდან ჩამოვიდნენ თავიანთი ხმების დასაცავად.
შეგახსენებთ, ზუგდიდის 67,15 საარჩევნო ოლქში, ქართული ოცნების კანდიდატმა ამირან ლაგვილავამ ხმების 48.96% დააგროვა (613 ხმა), ხოლო ენმ-ის კანდიდატმა ვარადებულ ლაშხიამ – 49.76% (623 ხმა)