ირმა ნადირაშვილის ინფორმაციით, კორცხელის 53 -ე საარჩევნო უბანზე 10 წუთის დაგვიანებით დაწყებული კენჭისყრის პროცედურის საფუძველზე მათ საჩივრით მიმართეს ცენტრალურ საარჩევნო კომისიას. დეპუტატი აცხადებს, რომ დღევანდელი არჩევნების გამო თბილისიდან სპეციალურად ჩამოიყვანეს სპორტსმენები, რაგბისტები და ისინი საარჩევნო უბნების პერიმეტრზე სიტუაციას აკვირდებიან. ირმა ნადირაშვილი აცხადებს, რომ მიუხედავად სახელისუფლებო ძალების მობილიზებისა, მათ არ გაუჭირდებათ არც ხმების მოგროვება და არც მისი დაცვა.
არსებული ინფორმაციით, კორცხელის შუალედური არჩევნებისთვის თბილისიდან რაგბისტები არიან ჩამოსულები. ისინი დღეს ზუგდიდში, მეორე სკოლის მიმდებარე ტერიტორიაზე შენიშნეს. მედიის წარმომადგენლების გამოჩენის შემდეგ ჯერ ბოტანიკურ ბაღში დაიმალნენ, შემდეგ კი საკუთარი ავტომობილებით გაურკვეველი მიმართულებით გადაადგილდნენ. როგორც ისინი აცხადებენ, ზუგდიდში დასასვენებლად, ნაწილი კი გასართობად ჩამოვიდა.