ოკუპირებული აფხაზეთის დე – ფაქტო შსს მინისტრის ლეონიდ ძიაფშბას განცხადებით, ამ დილით, დაახლოებით ათ საათზე სოხუმის ცენტრში, ლაკობას ქუჩაზე მდებარე საქალაქო ტრანსპორტის გაჩერებასთან უცნობმა პირებმა ცეცხლი გახსნეს. მათი სამიზნე იყო ვინმე სქვერია, ადრე ნასამართლევი პირი, რომელიც ახლახან გამოვიდა სასჯელააღსრულების დაწესებულებიდან. მინისტრის თქმით, თავდამსხმელები ორნი იყვნენ, გაჩერებასთან ისინი მსუბუქი ავტომანქანით მივიდნენ და გადმოუსვლელად გაუხსნეს ცეცხლი ავტომატური იარაღიდან სქვერიას, რომელიც ამ დროს იქვე პარკირებულ მანქანასთან იდგა. თვითმხილველები აცხადებენ, რომ იგი დაჭრილია მუცლის არეში და გადამსხვრეული აქვს ქვედა კიდურები.
სოხუმის შინაგან საქმეთა სამმართველოში განგაში გამოცხადდა. ადგილზე მუშაობს ოპერატიული ჯგუფი.