XI საერთაშორისო ფესტივალის – “აღდგომიდან ამაღლებამდე“ დღეს ზუგდიდში ანდრია დადიანის სახელობის სკვერში საზეიმოდ გაიხსნა.ორგანიზატორების თქმით, ფესტივალი სიმბოლურად ნონა გაფრინდაშვილის დაბადებისა და ვარსკვლავის გახსნის დღეს დაემთხვა..ქართველ მოჭადრაკეს, მსოფლიოს ხუთგზის ჩემპიონს დღეს, ჭადრაკის სასახლის წინ ვარსკვლავს გაუხსნიან.
ნონა გაფრინდაშვილი 1941 წლის 3 მაისს ზუგდიდში დაიბადა. ის იყო ფიდეს ქალთა კომისიის თავმჯდომარე, საქართველოს ეროვნული ოლიმპიური კომიტეტის პირველი პრეზიდენტი, საქართველოს ჭადრაკის ფედერაციის პრეზიდენტი.ფესტივალი მე-11 წელია ტარდება. ის 2006 წელს "სრულიად საქართველოს კათოლიკოს-პატრიარქის საერთაშორისო საქველმოქმედო ფონდისა" და "აკაკი რამიშვილის ფონდის – ტრადიცია და ინოვაცია"-ს მიერ დაარსდა. ზუგდიდში ფესტივალი ზუგდიდისა და ცაიშის მიტროპოლიტის ლოცვა-კურთხევით იმართება. ფესტივალის ორგანიზატორია ზუგდიდის წმ. გიორგის სახელობის სასულიერო გიმნაზია, რომელიც ჭადრაკის ფესტივალზე წარმოდგენილია ბეჭვაიების მრავალშვილიანი ოჯახიდან წარმოდგენილი გუნდით, რომლის ერთ-ერთი წევრი მაია ბეჭვაია წელს 14 წლამდე მოზარდთა შორის საქართველოს ჩემპიონი გახდა.ტურნირი ზუგდიდის საჭადრაკო კლუბში „ნონა“ გაიხსნა და დღესვე დასრულდება. ფესტივალი, რომელშიც მონაწილეობას 18 ეპარქიის 24 გიმნაზიის აღსაზრდელები მიიღებენ, დღეს ჭადრაკის ტურნირით გაგრძელდება და ხვალ, 4 მაისს გიმნაზიელების მიერ ღვთისშობლის კვართის მოლოცვით, სააღდგომო ნახატებისა და ნაკეთობების გამოფენითა და საზეიმო კონცერტით დასრულდება.