საქართველოს პარლამენტის თავმჯდომარე დავით უსუფაშვილი პოლონეთში მიმდინარე ევროპა-უკრაინის მეცხრე ეკონომიკური ფორუმში მონაწილეობს. პლენარულ სხდომაზე წარმოთქმულ სიტყვაში იგი საქართველოსა და უკრაინის წინაშე მდგარ პრობლემებსა და დასავლეთის მხარდაჭერის მნიშვნელობას შეეხო.
"საქართველო და უკრაინა იზიარებენ ისტორიულ წარსულს, ისევე, როგორც აწმყოს. ჩვენ ერთად მივაღწიეთ წარმატებას ევროკავშირის გზაზე. ამავდროულად, ორივე ქვეყანამ განიცადა მისი სუვერენიტეტის დარღვევა და ჩვენი ტერიტორიები დღესაც ოკუპირებულია. საქართველოს და უკრაინას არსებულ პრობლემებთან გასამკლავებლად ერთმანეთის გვერდში დგომა სჭირდებათ. რაც შეეხება სანქციების თემას, მახსოვს, საქართველოში რა მოხდა 2008 წელს, და მახსოვს ის დაპირებებიც, რაც მსოფლიოს ჰქონდა. თუმცა, ასევე მახსოვს 2014 წლის სოჭის ოლიმპიადა, რომელიც ოკუპირებული ტერიტორიიდან 15 კილომეტრში ჩატარდა. სამწუხაროდ, მაშინ მსოფლიო ლიდერებს, თითქმის აღარ ახსოვდათ, რა მოხდა 2008 წლის აგვისტოში. მიმაჩნია, რომ აგრესორის და ოკუპანტის წახალისება არ უნდა მოხდეს,“- აღნიშნა დავით უსუფაშვილმა.
.