ზუგდიდის რეფერალურ საავადმყოფოში ე.წ. ღორის გრიპის სიმპტომებით 59 წლის მამაკაცია მოთავსებული.
მას ორმხრივი პნევმონია და მაღალი სიცხე აღენიშნება. იგი გრიპის ნიშნების გამოვლენიდან მეოთხე დღეს მიიყვანეს საავადმყოფოში. მამაკაცი ამ დროისთვის ხელოვნური სუნთქვის აპარატზეა შეერთებული.იგი ზუგდიდში გალიდან გადმოიყვანეს.
ცნობისთვის, 18 იანვარს ზუგდიდის რეფერალურ საავადმყოფოში H1 N1-თ 68 წლის ქალბატონი გარდაიცვალა. ისიც ოკუპირებული ტერიტორიიდან იყო გადმოყვანილი. დაავადებათა კონტროლის ეროვნულ ცენტრში ადასტურებენ, რომ პაციენტს ქრონიკული დაავადება ჰქონდა. მეორე შემთხვევა დაფიქსირდა გუშინ – გარდაიცვალა ფოთიდან გადმოყვანილი შუახნის ქალბატონი. თუმცა არის თუ არა მისი სიკვდილის მიზეზი ღორის გრიპი, ჯერჯერობით დადგენილი არ არის. თუ სავარაუდო დიაგნოზი დადასტურდ,ა ეს მიმდინარე წლის იანვარში ე.წ. ღორის გრიპით გარდაცვალების მესამე შემთხვევაა საქართველოში.
მიუხედავად იმისა, რომ ერთერთი გარდაცვლილი და ამჟამად მძიმე მდგომარეობაში მყოფი პაციენტი ზუგდიდის საავადმყოფოში გალიდან იქნა გადმოყვანილი, აფხაზეთის დე ფაქტო რესპუბლიკის ჯანდაცვის სამინისტრო აცხადებს, რომ ფხაზეთში H1N1 ჯერ არ დაფიქსირებულა, თუმცა მთავარი სანიტარული ექიმი ვლადიმერ ბერულავა განმარტავს, რომ აფხაზეთში არ არსებობს ვირუსის დასადგენად საჭირო ტესტები და ასეთ შემთხვევას რომ ადგილიც ჰქონდეს, მის გამოვლენას ექიმები ვერც შეძლებენ ,,საქმე იმაშია, რომ ვირუსის გამოსავლენად სპეციალური ტესტებია საჭირო, რომლის შეძენის საშუალება ჩვენ არ გვაქვს“, – განაცხადა მან ,,ნუჟნაია გაზეტასთან '' საუბარში.
სპეციალისტები გართულების თავიდან აცილების მიზნით მოსახლეობას ექიმთან დროულ ვიზიტს ურჩევენ, თუმცა იმასაც არ მალავენ, რომ სოხუმში ვირუსის საწინააღმდეგო ვაქცინებიც არ აქვთ.
საქართველოს დაავადებათა კონტროლის ეროვნული ცენტრის ცნობით, ქვეყანაში ამჟამად ყოველ 100 ათას მოსახლეზე H1N1-ით 250-მდე ადამიანია დაავადებული, თუმცა ჯანდაცვის მინისტრმა დავით სერგეენკომ დღეს გამართულ პრესკონფერენციაზე, რომელიც მიეძღვნა ხელისუფლების ნაბიჯებს სასწრაფო დახმარების სამსახურების მუშაობის ნორმალიზაციისათვის, განაცხადა, რომ საქართველოში გრიპის ეპიდემიის არანაირი საშიშროება არ არსებობს, და ეს ნაბიჯები ეპიდემიის სამართავად კი არ არის მიმართული, არამედ სასწრაფო დახმარების სამსახურების გამართულ და ეფექტიან მუშაობაზე .