ამ წუთებში საქალაქო სასამართლო ყოფილი მაღალჩინოსნების აღკვეთის ღონისძიების საკითხზე მსჯელობს. დათა ახალაია, გიგი კალანდაძე, მეგის ქარდავა და რომან შამათავა ცემისა და წამების ფაქტებზე სისხლის სამართლის პასუხისგებაში ორი დღის წინ მისცეს.
პროცესის დაწყებამდე ყოფილი მაღალჩინოსნების ადვოკატებმა ჟურნალისტებთან განცხადებები გააკეთეს. ახალაიას, კალანდაძის, ქარდავას და შამათავას ადვოკატებს მიაჩნიათ, რომ საქმეში არ არსებობს მტკიცებულებები, რომელიც მათი დაცვის ქვეშ მყოფთა ბრალეულობას დაადასტურებს, აქედან გამომდინარე, ისინი ითხოვენ, ამ პირთა მიმართ აღკვეთის ღონისძიება არ იქნას გამოყენებული.
ამასთან, დათა ახალაიას ადვოკატ ირაკლი ზაქარეიშვილს მიაჩნია, რომ პროკურატურა რუსეთის დავალებით მოქმედებს.
"პროკურატურა სრულ აბსურდში გადავარდა, როგორც სჩვევია. იგი რუსეთის სპეცსამსახურების დავალებებს ასრულებს,"- აცხადებს ზაქარეიშვილი.
გიგი კალანდაძე, მეგის ქარდავა და დათა ახალაია საქართველოში არ იმყოფებიან, რომან შამათავა კი პატიმრობაშია და დღევანდელ პროცესს პროტესტის ნიშნად არ ესწრება.
რაც შეეხება შსს სამეგრელო – ზემო სვანეთის სამხარეო პოლიციის ყოფილ თანამშრომელს გიორგი სამუშიას, იგი პროცესს ესწრება და კატეგორიულად უარყოფს ბრალდებას. იგი აცხადებს, რომ მასზე დიდი ხანია მიმდინარეობს ზეწოლა სამხედრო პოლიციის დეპარტამენტის ხელმძღვანელობის, კერძოდ, უფროსის მოადგილის მხრიდან სასურველი ჩვენებების მიღების მიზნით.