რაულ ხაჯიმბა მარტო არ ტოვებს რუსეთს და საგანგებო განცხადებით ეხმაურება ,,სირიაში რუსეთის სამხედრო თვითმფრინავის ჩამოგდებასთან დაკავშირებით''. განცხადება ხაჯიმბამ გააკეთა გუშინ საღამოს და როგორც პირველივე ფორმულირებაში ჩანს, ,,გაამყარა'' თვითმფრინავის ჩამოგდების მიზეზისა და ადგილის რუსული ვერსია, რომლის თანახმად, რუსულ გამანადგურებლს თურქეთის საჰაერო სივრცე არ დაურღვევია და სირიის ცაში ესროლეს თურქეთიდან.
,,აფხაზეთის რესპუბლიკა სრულ მხარდაჭერას უცხადებს რუსეთის ფედერაციას საერთაშორისო ტერორიზმთან ბრძოლაში, რომელიც წარმოადგენს საფრთხეს მშვიდობისა და სტაბილურობისათვის როგორც ახლოაღმოსავლეთ რეგიონში, ისე გლობალური მასშტაბით – ნათქვამია რაულ ხაჯიმბას განცხადებაში.
რუსეთის სამხედრო თვითმფრინავის ჩამოგდების ინციდენტს ჩვენ ვაფასებთ როგორც საერთაშორისო ტერორიზმის აღკვეთისათვის რუსეთის ძალისხმევის ჩაშლის მცდელობას და გადაჭრით ვგმობთ ამ აქტს.
გამოვთქვამთ იმედს, რომ საერთაშორისო საზოგადოება სათანადო შეფასებას მისცემს ამ მიუღებელ ქმედებებს, ისე, როგორც ეს შეესაბამება თანამშრომლობის ინტერესებს ტერორიზმის საფრთხესთან გამკლავებაში, რომლის მსხვერპლია სხვადასხვა ქვეყნის ათასობით მოქალაქე. '' – წერს ხაჯიმბა.
ნიშანდობლივია, რომ ხაჯიმბას განცხადებაში პირდაპირ ერთხელაც არ ნახსენები თურქეთის მხარე. იგი აშკარად ვერ არის კარგ დღეში, ერთის მხრივ ესმის, რომ ამგვარ განცხადებას არ მოუწონებენ არც აფხაზური დიასპორა თურქეთში და არც თურქული ბიზნესის ის წარმომადგენლები, რომლებიც საქართველოს გვერდის ავლით მიდიან მასთან კონტაქტზე და თანამშრომლობაზე, მაგრამ რუსეთის წინაშე ნაკისრი ვალდებულებაც თავისას ითხოვს…