აზერბაიჯანის საპარლამენტო არჩევნებში მმართველმა პარტიამ გაიმარჯვა. ცესკოს მონაცემებით, პრეზიდენტ ილჰამ ალიევის "ახალმა აზერბაიჯანმა" მილი მეჯლისში 125 ადგილიდან 70 ადგილი მოიპოვა. ცესკოს მონაცემებით, არჩევნებზე ამომრჩეველთა აქტივობა 56% იყო. არჩევნები ყველა ოლქში ჩატარებულად გამოცხადდა. ცენტრალური საარჩევნო კომისია ირწმუნება, რომ მნიშვნელოვანი დარღვევები არ მომხდარა.
არჩევნებს ბოიკოტი გამოუცხადა ყველა წამყვანმა ოპოზიციურმა პარტიამ და მთავრობა ოპონენტების დევნაში დაადანაშაულა. როგორც პარტია "მუსავატის" ლიდერმა არიფ გაჯილიმ სააგენტო "როიტერს" განუცხადა, პარტიამ არჩევნებში მონაწილეობაზე იმის გამო თქვა უარი, რომ წინასაარჩევნო პერიოდში უამრავი დარღვევა დაფიქსირდა.
როგორც "ბიბისი" აღნიშნავს, ოფიციალური ბაქოს მხრიდან დაწესებული შეზღუდვების გამო, ეუთომ აზერბაიჯანში დამკვირვებლების გაგზავნაზე უარი თქვა.