რუსთავი 2-ის გენერალური დირექტორი პროკურატურაში დაკითხვაზე იმყოფება. გვარამიამ გენერალურ პროკურატურას გუშინდელი განცხადების შესახებ უნდა მიაწოდოს ინფორმაცია. იგი დაკითხვაზე საქართველოს ახალგაზრდა იურისტთა ასოციაციის ადვოკატთან ლევან ვეფხვაძესთან ერთად მივიდა. საქართველოს ახალგაზრდა იურისტთა ასოციაციის თავმდჯომარის, ანა ნაცვლიშვილის თქმით, რუსთავი 2-ის ხელმძღვანელს იურიდიული დახმარება მათ თავად შესთავაზეს. 

"ჩემი ადვოკატი არ იმყოფება საქართველოში. ვიდრე ახალ ადვოკატს ვიპოვიდი, დრო დამჭირდა და შევთანხმდით ამ დროზე.

ვაპირებ დავასახელო  ადამიანი, რომელმაც ეს ინფორმაცია მომიტანა და არა – მემუქრებოდა. ის იყო ინფორმაციის მომტანი მთავრობისგან. ეს არ არის პირველი შემთხვევა, როცა მან ეს გააკეთა. ეს ადამიანი ასეთად ირაკლი ღარიბაშვილმა დამისახელა 2013 წლის ბოლოს. ამ ადამიანს ვიცნობ, ვენდობი და მთავრობასთანაც აქვს მას ურთიერთობა. ეს ადამიანი იყო მესენჯერი ჩვენს შორის. ეს ადამიანი არ არის გედი ფოფხაძე. ის არის ხელისუფლებასთან დაახლოებული პირი, თუმცა არა მაღალი თანამდებობის პირი," – განაცხადა ნიკა გვარამიამ. 

რუსთავი 2-ის დირექტორმა პროკურატურაში მიიტანა ის ვიდეომასალა, სადაც ასახულია იმ პიროვნების რუსთავი 2-ში შესვლა, რომელმაც მას სამთავრობო მესიჯები გადასცა. 

მთავარ პროკურატურასთან იმყოფებიან ჟურნალისტები და ნიკა გვარამიას ოჯახის წევრები.