დღეს ოკუპირებულ აფხაზეთთან პირობით საზღვარზე წყოუშის სკოლაში მიმავალი სამი მოსწავლე რუსმა მესაზღვრეებმა საზღვარზე არ გადმოატარეს.
მესაზღვრეთა თქმით, ბავშვებს საბუთები არ ჰქონდათ წესრიგში – საუბარია საშვებზე, რომელთაც უკვე მეორე წელია კანონის სრული დარღვევით არასრულწლოვანი ბავშვებისგან მოითხოვენ, თუმცა, თუ ადრე ეს პრობლემა გალის ადმინისტრაციის ჩარევით ასე თუ ისე მარტივად წყდებოდა, ეს ამჯერად ძალზე გართულდა – საქმე ისაა, რომ წლეულს გალის სკოლებში ოფიციალურად აიკრძალა ქართულ ენაზე სწავლება, და თუმცა ამ გადაწყვეტილების რეალიზაციას ჯერ პირი არ უჩანს, მშობლები, რომელთაც სურთ მათმა შვილებმა განათლება ქართულ ენაზე მიიღონ , არჩევენ უკუპირებული აფხაზეთის საზღვრის მიმდებარე ზუგდიდისა და წალენჯიხის სოფლების სკოლებში მიაბარონ ისინი.
ბავშვები, რომელნიც დღეს საზღვარზე არ გადმოატარეს, პირველკლასელები არიან, სხვა დანარჩენ თერთმეტ ბავშვს, რომელნიც შედარებით მაღალ კლასებში სწავლობენ, ეს პრობლემა არ შექმნიათ, რას იმის მანიშნებელია, რომ დე-ფაქტო აფხაზეთის განათლების ცდილობს რუსულენოვან სწავლებაზე გადასვლა განახორციელოს დაწყებით კლასებში მაინც და ხელს არ აძლევს მოსწავლეთა გადინება, რაც კითხვის ნიშნის ქვეშ დაააყენებს ამ კლასების დაკომპლექტებას.
ეს პროცესი დღეს და გუშინ არ დაწყებულა, აფხაზეთის განათლების სამინისტრო დიდი ხანია ცდილობს ადრეული ასაკიდან შეუქმნას გალში მცხოვრებ ქართველ ბავშვებს მშობლიურ სამყაროსთან და ენასთან გაუცხოებისა და შემდგომი რუსიფიკაციის პირობები, რასაც ნაწილობრივ აღწევს კიდეც – უკანასკნელ წლებში ენგურს გამოღმა მდებარე სოფლების სკოლებში გალიდან გადმოსულ ბავშვთა რაოდენობამ შესანჩნევად იკლო.
წალენჯიხის გამგებლის გია გულორდავას ინფორმაციით, დღეს მომხდარი ინციდენტის შესახებ ინფორმირებულია საქართველოს მთავრობა, რომელიც საქმის კურსში ჩააყენებს საერთაშორისო ორგანიზაციებს, რაც მისი აზრით, პრობლემის ბავშვების ინტერესების სასარგებლოდ მოგვარებას შეუწყობს ხელს.
მისივე ცნობით, საზღვართან იმყოფებოდნენ გალის რესურსცენტრის ხელმძღვანელი, შერიგებისა და სამოქალაქო თანასწორობის საკითხებში საქართველოს სახელმწიფო სამინისტროს და ადგილობრივი ხელისუფლების წარმომადგენლები.