თბილისის საკრებულოს დღეს დაგეგმილი სხდომა, რომელზედაც სტიქიით დაზარალებული მოსახლეობისთვის გამოყოფილი თანხების გადანაწილებაზე უნდა ემსჯელათ, გადაიდო.
როგორც საკრებულოში მედიისათვის განმარტავენ, ამის მიზეზია ის, რომ მერიამ არ წარმოადგინა სათანადო დოკუმენტაცია, რომლის მიხედვითაც უნდა შედგეს
დაზარალებულთა დახმარებისთვის აკუმულირებული 25 მილიონის ათვისების გეგმა.
დავით ნარმანიას კომენტარი ამ ფაქტზე ამოიწურა განცხადებით, რომ „დოკუმენტი მზად არის და მაგიდაზე დევს,“ შესაბამისად, გაურკვეველია, რამ შეუშალა ხელი დოკუმენტაციის გადანაცვლებას მერის მაგიდიდან საკრებულოს პორტფელში, უცნობია, აგრეთვე, კიდევ რა დრო დასჭირდება ამ გზის გავლას მერიიდან საკრებულომდე და როდის შემუშავდება პრინციპები, რომელთა მიხედვით უნდა მოხდეს თანხების გადანაწილება.
ოპოზიცია მთავრობას უმოქმედობაში ადანაშაულებს. თბილისის საკრებულოს ფრაქცია ,,ნაციონალური მოძრაობის'' თავმჯდომარის ირაკლი აბესაძის განცხადებით, ხელისუფლება უპასუხისმგებლოდ იქცევა და ყოველი დაგვიანებული დღე სტიქიით დაზარალებულთათვის გართულებულ ცხოვრებას ნიშნავს.