დასრულდა საქართველოს პრეზიდენტის გიორგი მარგველაშვილის სამუშაო ვიზიტი ბრატისლავაში, სადაც იგი ყოველწლიურ გლობალური უსაფრთხოების ფორუმში მონაწილეობდა.
,, ფორუმი საქართველოს უსაფრთხოების სიღრმისეული განხილვის საუკეთესო შესაძლებლობა აღმოჩნდა. ჩვენ შევძელით, რომ საქართველოს თემატიკა ყოფილიყო აქტუალური და ჩვენი ქვეყნის უსაფრთხოების გარანტიებზე შინაარსობრივად და საფუძვლიანად ესაუბრათ მსოფლიო ლიდერებს.
გარდა ამისა ჩვენ გვქონდა შესაძლებლობა, ნატო-ს დამფუძნებელი ქვეყნების ლიდერებთან, როგორიცაა გაერთიანებული სამეფოს პრემიერ-მინისტრი, ასევე შეერთებული შტატების სენატორთა დელეგაცია, განგვეხილა საქართველოს უსაფრთხოება და ამ საკითხზე გააქტიურებული დიალოგის აუცილებლობა. ხაზი უნდა გავუსვათ იმ ფაქტს, რომ აღმოსავლეთ ევროპის ქვეყნები განსაკუთრებით კარგად იაზრებენ საქართველოს როლს ევროპული და ევროატლანტიკური უსაფრთხოების კონტექსტში, და გარდა იმისა, რომ არიან ჩვენი ტრადიციული მხარდამჭერები, ვმუშაობთ იმაზეც, რომ ამის პარალელურად ისინი გახდნენ საქართველოს ძალიან აქტიური ადვოკატები როგორც ნატო-ს, ისევე ევროკავშირის ფორმატებში. ასე შეაფასა ფორუმში ქართული მხარის მონაწილეობის მნიშვნელობა საქართველოს პრეზიდენტმა ვიზიტის დასასრულს ქართული მედიისთვის მიცემულ ინტერვიუში.
საქართველოს დელეგაცია დღეს თბილისში ბრუნდება.
.