ოთარ თაქთაქიშვილის იუბილესადმი მიძღვნილი საღამო გაიმართება

0
79

რუსთაველის თეატრში დღეს კომპოზიტორ ოთარ თაქთაქიშვილის დაბადებიდან 90 წლისთავისადმი მიძღვნილი საღამო გაიმართება. 
როგორც "ინტერპრესნიუსს" კულტურის სამინისტროდან აცნობეს, რუსთაველის თეატრში, საქართველოს კულტურისა და ძეგლთა დაცვის სამინისტროს მხარდაჭერით, გაიმართება წარმოდგენა – "მთვარის მოტაცება – ქართულ-აფხაზურ ურთიერთობათა მემკვიდრეობითობა". 
სამინისტროს ინფორმაციით, ღონისძიება ქართველი კომპოზიტორის ოთარ თაქთაქიშვილის დაბადების 90 წლის იუბილეს ეძღვნება და ხაზს უსვამს სამი ქართველი ხელოვანის: კონსტანტინე გამსახურდიას, ოთარ თაქთაქიშვილისა და შოთა ნიშნიანიძის კავშირს აფხაზეთთან.
ღონისძიებაში მონაწილეობენ თბილისის ზაქარია ფალიაშვილის სახელობის ოპერისა და ბალეტის სახელმწიფო პროფესიული თეატრის ორკესტრი, დირიჟორი ზაზა აზმაიფარაშვილი, ანსამბლი "რუსთავი", სოლისტები: მაყვალა ქასრაშვილი, ირინე შერაზადიშვილი, თემურ გუგუშვილი, ელდარ გეწაძე, ალუდა თოდუა, ირინე ალექსიძე, ლევან მაკარიძე, კონცერტმაისტერი – დარეჯან მახაშვილი.
სამინისტროს განცხადებით, ნაწყვეტებს კონსტანტინე გამსახურდიას რომანიდან წაიკითხავენ დიმიტრი ჯაიანი და ელდინო საღარაძე. ასევე, ოპერის ლიტერატურული მასალის, მონაწილეების, ხალხურ მუსიკასთან კავშირისა და ოპერის დადგმის შესახებ საღამოზე თამარ წულუკიძე, ანზორ ერქომაიშვილი, გიზო ჟორდანია ისაუბრებენ. 

 

საქართველოს კულტურისა და ძეგლთა დაცვის სამინისტროსა და აფხაზეთის ავტონომიური რესპუბლიკის მთავრობასთან ერთად საღამოს ორგანიზატორია აფხაზეთის სულიერებისა და კულტურის ცენტრი.

 

კომენტარის დატოვება

Please enter your comment!
Please enter your name here