სოფელ ერგეტაში ამ წუთებში შუალედური არჩევნები მშვიდ ვითარებაში დარღვევების გარეშე მიმდინარეობს. სოფელში არჩევნები მაჟორიტარული საარჩევნო სისტემით იმართება. შუალედურ არჩევნებში სამმა პოლიტიკურმა ორგანიზაციამ წარადგინა კანდიდატები: ერთიანი ნაციონალური მოძრაობიდან კობა ბულია, კოალიცია ქართული ოცნებიდან ვასილ გაბისონია და თავისუფალი საქართველოდან ბაჩუკი ნაროუშვილი. ცესკო-ს მონაცემებით, საარჩევნო უბანზე სულ 1152 ამომრჩეველია რეგისტრირებული. სოფელ ერგეტაში შუალედური არჩევნების ჩატარების აუცილებლობა მას შემდეგ დადგა, რაც 79 წლის ასაკში გარდაიცვალა ზუგდიდის მუნიციპალიტეტის საკრებულოს უხუცესი წევრი ნაპო გაბისონია. სოფელ ერგეტის გარდა შუალედური არჩევნები სენაკის ორ საარჩევნო უბანშიც იმართება.