,,პროცესები, რომლებიც ახლა მიმდინარეობს სამუზეუმო სივრცეში, არის ეროვნული მუზეუმის შეურაცხმყოფელი და მისი ნგრევისა და დასუსტებისკენ მიმართული.” –განაცხადა ეროვნული მუზეუმის დირექტორმა დავით ლორთქიფანიძემ  საგანგებო ბრიფინგზე, სადაც   უპასუხა ყველა იმ კითხვას, რომელიც საზოგადოებაში დაგროვდა, კერძოდ, შემცირებულ პროექტებზე, სამეცნიერო კვლევებსა და გათავისუფლებულ თანამშრომლებზე, კულტურის მინისტრის ბრალდებზე ე.წ. დაკარგულ ტილოებთან დაკავშირებით

“არცერთი ნივთი, მას შემდეგ რაც ეროვნული მუზეუმი შეიქმნა, 2005 წლიდან და დღეს 2022 წლამდე ე.წ. დაკარგული არ არის. კიდევ ერთხელ ვუსვამ ხაზს, 1950 წლიდან დაიწყო ნიმუშების გატანა, უფრო მეტად იყო 90–ში. ეროვნულმა მუზეუმმა დაიწყო მისი დაბრუნება, დიდი ნაწილის დაბრუნება, დაახლოებით 80%–ზე მეტის შევძელით. მინდა ხაზი გავუსვა, ეროვნული მუზეუმი კუნძული კი არ იყო, ჩვენ ვმუშაობდით კულტურის სამინისტროსთან ერთად, ყველა ამ კითხვებზე პასუხები მიდიოდა კულტურის სამინისტროში.” – ამბობს დავით ლორთქიფანიძე., რომელსაც მედიასთან შეხვედრაზე დაუპირისპირდა   თეა წულუკიანის მიერ დანიშნული ხელოვნების მუზეუმის დირექტორი ნიკა ახალბედაშვილი

მანამდე, ბრიფინგის მიმდინარეობისას ნიკა ახალბედაშვილმა ლორთქიფანიძეს ჰკითხა, თუ რატომ აკლია ეროვნულ მუზეუმს კონკრეტული ფერწერული ნიმუშები. ახალბედაშვილი ამტკიცებდა, რომ ფერწერული ნიმუშები ლორთქიფანიძის დირექტორობისას დაიკარგა, თუმცა ახალბედაშვილმა კითხვას, თუ რომელ წელს გაიტანეს ნამუშევრები, არ უპასუხა.

დავით ლორთქიფანიძე ამბობს, რომ  პირადად ისიც და მუზეუმის სხვა თანამშრომლებიც  ყოველთვის მზად არის ნებისმიერ კითხვაზე საპასუხოდ.

,,თუ საჭიროა, პროკურატურაში უნდა გადაიგზავნოს, როდესაც ლაპარაკია აუდიტზე, აუდიტი არის სარეკომენდაციო ყოველთვის და ეს ყოველწლიურად ტარდებოდა. ის რაღაც განსაკუთრებული არ ყოფილა. ყოველგვარი გადამეტების გარეშე, ძალიან მარტივად შემიძლია ყველა კითხვაზე გიპასუხოთ, ეს შეფასებები არის გადამეტებული და თუ არის ცალკეული უზუსტობები, შეცდომები, აუდიტის ფუნქციაა, რომ ეს გამოსწორდეს ” – განაცხადა მან