რკინიგზელებმა 18-დღიანი პროტესტის შემდეგ შიმშილობა შეწყვიტეს, თუმცა სამართლებრივ ბრძოლას იწყებენ. – ამის შესახებ მათ გუშინ საღამოს მთავრობის კანცელარიასთან გამართულ საპროტესტო აქციაზე განაცხადეს.
რკინიგზის დეპარტამენტის წინ, 18 დღიანი შიმშილობის აქციამ, ნათლად დაგვანახა რამდენად ღრმად და საფუძვლიანად აქვს საქართველოში კლანურ დაჯგუფებებს ფესვები გადგმული , რამდენად გავლენიან და საშიშ ძალასთან გვიწევს დაპირისპირება! – ნათქვამია აქციაზე წაკითხულ მანიფესტში.- თითქმის ყველა სახელმწიფო უწყება, იარაღად იქნა გამოყენებული ერთი კახელი მუშის, რკინიგზელი უჩა ხვთისიაშვილის და ნამდვილი პროფკავშირული მოძრაობის – რკინიგზელთა ახალი პროფკავშირის წინააღმდეგ.
ჩვენმა ბრძოლამ წარმოაჩინა ყველა ის სისტემური ხარვეზი, რომელიც აფერხებს ჩვენს ქვეყანას ევროპულ და დემოკრატიული განვითარების გზაზე – – რკინიგზელებმა ბოლო ექვსი წლის განმავლობაში, არაერთი ბრძოლა გაუმართა იმ კლანურ და უპასუხისმგებლო სისტემას, რომელიც დღეს, სახელმწიფო კომპანია საქართველოს რკინიგზას ძარცვავს!
შეგახსენებთ, რკინიგზელებმა საპროტესტო ქცია დაიწყეს მას შემდეგ, რაც "საქართველოს რკინიგზის" ადმინისტრაციამ სამი თანამშრომელი გაათავისუფლა იმის გამო, რომ მათ უარი თქვეს ემუშავათ მარნეული-გარდაბნის მონაკვეთზე იმ პირობებში, რომელიც მათ ადმინისტრაციამ შესთავაზა, კერძოდ ხელმძღვანელობამ უარი განაცხადა მათ უზრუნველყოფაზე საცხოვრებლით ტრანსპორტითა და კვების ხარჯებით.