აფხაზეთის სომხებს ისლამურ სახელმწიფოსთან ბრძოლისკენ მოუწოდებენ. ასეთი წინადადებით მიმართა აფხაზეთის სომხურ სათვისტომოებს სომეხთა საერთაშორისო მოძრაობა ,,NAR – ის ლიდერმა ამრამ პეტროსიანმა. კერძოდ, მის მიმართვაში ნათქვამია: ,,ვლადიმერ პუტინმა მიიღო სწორი გადაწყვეტილება, წინ აღუდგეს ტერორისტული ჭირის გავრცელებას მთელ სოფლიოში, ჩვენი კავკასიის ჩათვლით, მაგრამ ეს არ გვაძლევს უფლებას თვითდამშვიდებას მივეცეთ. სანამ რუსი მფრინავები ტერორისტების ბაზებსა და საბრძოლო პოზიციებს ბომბავენ, ჩვენ უნდა გამოვიჩინოთ მაღალი მოქალაქეობრივი აქტივობა . უნდა გვახსოვდეს, რომ სირიის სისხლისმღვრელ ბრძოლებში მონაწილეობენ ჩვენი ძმები – სომხები და  აფხაზები და ამ ძნელბედობის წუთებში მათ გვერდით დგომა გვმართებს. ჩვენ ვერ უნდა შეგვაშინონ ტერორისტებმა, რადგან ზურგს გვიმაგრებს ჩვენი ხალხის – შემოქმედის დამცველის, მშრომელის– ათასწლოვანი კულტურა და ისტორია.  ამიტომ გთავაზობთ უახლოეს დროში შევქმნათ საერთაშორისო მოძრაობა ,,ნარისა" და აფხაზეთის სომხური სათვისტომოების ერთობლივი დელეგაცია, რომელიც გაემგზავრება  სირიაში, უშუალოდ საომარ პოზიციებზე, რათა იქ, ადგილზე თანამოძმეებთან ერთად შევიმუშაოთ ეფექტიანი მრავალმხრივი მოქმედების სტრატეგია ტერორიზმთან ბრძოლის მხარდასაჭერად.   ამასთან გთავაზობთ უშუალოდ ბრძოლის წინახაზის სიახლოვეს შევქმნათ ჰუმანიტარული შტაბი, რომელიც ითანამშრომლებს სირიის არმიასთან და  მოხალისე სომეხთა რაზმებთან. დარწმუნებული ვარ, დადებითად გამოეხმაურებით ამ მოწოდებას. თვით ეპოქა მოითხოვს ჩვენგან გაბედულსა და უშიშარ ქმედებას –ისტორია იმახსოვრებს გმირებს და ივიწყებს ლაჩრებს!''– ნათქვამია მიმართვაში.