საქართველოს მთავარმა პროკურატურამ პოლონეთს საქართველოს მესამე პრეზიდენტის, მიხეილ სააკაშვილის საკითხთან დაკავშირებით მიმართა. ქვეყნის მთავარმა საგამოძიებო უწყებამ სამართლებრივი პროცედურები მას შემდეგ დაიწყო, რაც პოლონურმა მედიამ გაავრცელა ინფორმაცია, რომ სააკაშვილი ვარშავაშია და ოფიციალურ ღონისძიებებში იღებს მონაწილეობას.
“მიხეილ სააკაშვილის პოლონეთის რესპუბლიკაში ვიზიტთან დაკავშირებით, მედია საშუალებებით გავრცელებული ინფორმაციის საფუძველზე, საქართველოს მთავარმა პროკურატურამ მიმართა პოლონეთის რესპუბლიკის კომპეტენტურ ორგანოებს და ამ დროისთვის დაწყებულია კანონით გათვალისწინებული ყველა შესაბამისი პროცედურა,“ – განაცხადა მთავარი პროკურატურის საზოგადოებასთან ურთიერთობის დეპარტამენტის უფროსის მოადგილემ გიორგი გრძელიშვილმა.
"ერთიანი ნაციონალური მოძრაობის” პოლიტიკური საბჭოს თავმჯდომარის მოადგილის ზაზა ბიბილაშვილის თქმით, პროკურატურის ეს ნაბიჯი კიდევ ერთხელ დააზიანებს სახელმწიფოს ინტერესებს.
“დღესავით ნათელია, რომ არანაირი ექსტრადირება არ მოხდება, უბრალოდ საქართველოს პროკურატურა კიდევ ერთხელ შეარცხვენს საქართველოს სახელმწიფოს, როგორც ეს არაერთხელ გააკეთა უკრაინის შემთხვევაში, აზერბაიჯანის შემთხვევაში, ინტერპოლის შემთხვევაში, თურქეთის შემთხვევაში. ცხადია სააკაშვილს არავინ არ გადასცემს რუს ოლიგარქს, უბრალოდ ეს იქნება ჩვენი სახელმწიფოს ინტერესების დამაზიანებელი კიდევ ერთხელ,“ – განაცხადა ბიბილაშვილმა.