გუშინ შტორმმა და ქარიშხალმა, როგორც მოსალოდნელი იყო, ყველაზე დიდი სიმძლავრით გადაუარა ბათუმი- ქობულეთის სანაპირო ზოლს, შტორმი ოდნავ ნაკლები ძალით, მაგრამ მაინც იყო ანაკლია- განმუხურშიც. საბედნიეროდ, ამას უბედური შემთხვევა ან სხვა რაიმე გართულება არ მოჰყოლია, თუ არ ჩავთვლით იმას, რომ ბათუმში 21 წლის ახალგაზრდამ ყურად არ იღო გაფრთხილება, მაინც შევიდა ზღვაში და მისი გამოყვანა მაშველებს მოუხდათ.
შსს-ს საგანგებო სიტუაციების მართვის სააგენტოს ცნობით, შავი ზღვის სანაპირო ზოლში საშტორმო მდგომარეობა, სავარაუდოდ, დღესაც, 29 ივლისს შუადღემდე შენარჩუნდება.
ამიტომ, კვლავ ძალაში რჩება გუშინდელი კატეგორიული გაფრთხილება, რომ ზღვაში შესვლა არ შეიძლება.
სააგენტო დღესაც აფრთხილებს ადგილობრივ მოსახლეობას და დამსვენებლებს, რომ სანამ სანაპიროზე არსებულ ყველა საგუშაგოზე წითელი ალმებია აღმართული: არ შევიდნენ ზღვაში, დაემორჩილონ მაშველთა მითითებებს, ყურადღება მიაქციონ ბავშვებსა და მოზარდებს, ნუ დატოვებენ მათ მეთვალყურეობის გარეშე“,.
შეზღუდვები გაგრძელდება მანამ, სანამ საშიშროება არ გადაივლის და სანაპიროზე თეთრი ალმები არ აღიმართება. – ნათქვამია სააგენტოს მიერ გავრცელებულ ინფორმაციაში.
გუშინ შსს შავი ზღვის სანაპირო ზოლზე მოსალოდნელი შტორმის გამო მუშაობის საგანგებო რეჟიმზე გადავიდა. შავი ზღვის სანაპირო ზოლზე მოსალოდნელ 4-ბალიანი შტორმის გამო მ სანაპიროზე წითელი ალმები აღმართა. წყალზე მაშველები ადგილობრივ მოსახლეობას და ტურისტებს, უბედური შემთხვევების თავიდან აცილების მიზნით, მოსალოდნელი საფრთხის შესახებ რამდენიმე ენაზე აფრთხილებენ.
.