ინციდენტების პრევენციისა და მათზე რეაგირების მექანიზმების ფარგლებში გალში მორიგი შეხვედრა გაიმართა. როგორც სახელმწიფო უსაფრთხოების სამსახურის ანალიტიკური დეპარტამენტის ხელმძღვანელის მოადგილემ, კახაბერ ქემოკლიძემ შეხვედრის დასრულების შემდეგ ენგურის ხიდზე მყოფ ჟურნალისტებს განუცხადა, შეხვედრა ორ ძირითად საკითხს შეეხო – გიგა ოთხოზორიას მკვლელობის და რამდენიმე თვის წინ, საოკუპაციო ხაზთან ახლოს გატაცებული მამა-შვილის – არჩიკო და პაატა როგავების საკითხს. ქემოკლიძის ინფორმაციით, ოთხოზორიას საქმეში მოცემულობა არ შეცვლილა.
რაც შეეხება საოკუპაციო ხაზთან ახლოს გატაცებული მამა-შვილის – არჩიკო და პაატა როგავების საქმეს – სახელმწიფო უსაფრთხოების სამსახურის ხელმძღვანელის მოადგილის ინფორმაციით, ამ კვირის ბოლოს გაიმართება ე.წ აფხაზური სასამართლო, სადაც მოხდება კონკრეტული გადაწყვეტილების მიღება.
ინციდენტების პრევენციისა და მათზე რეაგირების მექანიზმების ფარგლებში მორიგი შეხვედრა 17 სექტემბრისთვის არის ჩანიშნული.