ორგანიზაცია ,,მოქალაქემ'' Facebook-ში თავის გვერდზე განათავსა განცხადება, რომელშიც უარყოფს აფხაზურ მედიაში გავრცელებულ ინფორმაციას იმის შესახებ, რომ ბიძინა ივანიშვილს განზრახული აქვს აფხაზეთის ტერიტორიაზე მიწისა და სხვა სახის უძრავი ქონების შესყიდვა და ამისათვის მან სპეციალური ფონდიც კი შექმნა. ,,ამასთან დაკავშირებით საჭიროდ მიგვაჩნია ოფიციალურად განვაცხადოთ, რომ ეს ინფორმაცია არ შეესაბამება სინამდვილეს და, შესაბამისად, ასეთი ფონდიც არ არსებობს", – ნათქვამია განცხადებაში.
ბიძინა ივანიშვილის ინტერესზე, შეიძინოს აფხაზეთში უძრავი ქონება, მიმდინარე წლის აგვისტოში, აფხაზეთის ჰუმანიტარული კვლევების ინსტიტუტში გამართულ სამეცნიერო კონფერენციაზე ისტორიკოსმა თემურ აჩუგბამ განაცხადა. მისი თქმით, ბიძინა ივანიშვილმა სპეციალური ფონდი დააფუძნა და მზადაა, ამ ფონდში მილიარდი დოლარი შეიტანოს აფხაზეთში უძრავი ქონების შეძენის მიზნით.