საპარლამენტო უმრავლესობა  საქართველოს პრეზიდენტისა და ადმინისტრაციის წარმომადგენლების მხრიდან გაკეთებული განცხადებების გამო ბოდიშის მოხდის მოითხოვს.

 

,,ვფიქრობ, პრეზიდენტმა ბოდიში უნდა მოიხადოს თავისი მოხელის გადაცდომის გამო, – ასე გამოეხმაურა ფრაქცია „ქართული ოცნების“ თავმჯდომარე მამუკა მდინარაძე პრეზიდენტის საგარეო ურთიერთობათა მდივან თენგიზ ფხალაძის განცხადებას, რომლის შეფასებით, პარლამენტის თავმჯდომარე ირაკლი კობახიძემ ელჩებს „პარტიული დავალებები“ მისცა.

 

„ალბათ, ოპოზიციურ ფრთაზე მიკერძოებული უნდა იყო, რომ ირაკლი კობახიძის განცხადებებში პარტიული დავალებები ამოიკითხო. ეს უკვე ინტერპრეტირების აქამდე ცნობილ ფარგლებსაც კი სცილდება. გარდა ამისა, პრეზიდენტის ადმინისტრაციის მოხელის ეს განცხადება შეურაცხყოფას აყენებს, როგორც საქართველოს პარლამენტის თავმჯდომარეს, ასევე, მთლიანად დიპლომატიურ კორპუსს, რომელსაც პრეზიდენტის მხარე პარტიულ აქტივად მოიხსენიებს. სწორედ ამის გამო, წესით, პრეზიდენტმა ბოდიში უნდა მოიხადოს თავისი მოხელის გადაცდომის გამო, რომელმაც პარლამენტის თავმჯდომარე და დიპლომატიური კორპუსი შეურაცხყო“, – განაცხადა მდინარაძემ.

 

უმრავკწესობის მიერ პრეზიდენტისა და მისი ადმნისტრაციის წარმომადგენლებისგან ბოდიშის მოხდის მოთხოვნას   „ნაციონალური მოძრაობის“ ლიდერები აფასებენ როგორც  მორიგ თავდასხმას  პრეზიდენტზე, რაც  არაფორმალური მმართველობის „მახინჯ ფორმას“ უკავშირდება.

 

„ყველაფერს აკეთებენ, ვგულისხმობ პარლამენტის სპიკერს და მის მორჩილ უმრავლესობას, რომ აამონ ივანიშვილს. ეს ყველაფერი არის გამომდინარე მახინჯი არაფორმალური მმართველობის მოდელიდან. ამიტომ, არიან ახლა ამ თავდასხმებით დაკავებული პრეზიდენტზე, იმის მაგივრად, რომ იმუშაონ დეოკუპაციაზე,“ – აცხადებს ნიკა რურუა.