ზუგდიდის მუნიციპალიტეტის სოფელ რიყეში ძალოსნობის ახალი, რეაბილიტირებული დარბაზი გაიხსნა. დარბაზის გახსნაზე იმყოფებოდნენ მსოფლიოს ჩემპიონი ახალგაზრდებს შორის გიორგი ჩხეიძე და მსოფლიოსა და ევროპის ჩემპიონი ჭაბუკებს შორის ირაკლი ჩხეიძე, რომლებიც სწორედ ამ დარბაზში გაიზარდნენ. დარბაზის გახსნას სპორტისა და ახალგაზრდობის საქმეთა მინისტრი, ტარიელ ხეჩიკაშვილი ადგილობრივი ხელისუფლების წარმომადგენლებთან და სამგზის ოლიმპიური ჩემპიონი კახი კახიაშვილთან ერთად დაესწრო. დარბაზში 40 -მდე ახალგაზრდა ვარჯიშობს, მათ შორის 7 ძალოსანი საქართველოს ეროვნული ნაკრების შემადგენლობაშია.
სოფელ რიყეში, რომელიც ძალოსნობის დიდი ტრადიციებით გამოირჩევა, ძალოსნობის დარბაზი 1989 წელს აშენდა, თუმცა წლების მანძილზე დარბაზში სპორტსმენებისთვის სავარჯიშო პირობები არ არსებობდა. დარბაზს სრული რეაბილიტაცია ცოტა ხნის წინ ჩაუტარდა და ის თანამედროვე ინვენტარით და სავარჯიშო მოწყობილობებით აღიჭურვა.