სიძულვილის ენის შემცველი ბანერები დედაქალაქის შემდეგ ზუგდიდშიც გამოჩნდა – არჩევნებამდე 2 კვირით ადრე “სისხლიანი ბანერები” ქალაქის თვალსაჩინო ადგილებში გამოფინეს. ოპოზიციის შეფასებით, ხელისუფლების ამგვარი ქმედება უუნარობისა და სრული კაპიტულაციის გამოხატულებაა. ბანერებთან დაკავშირებით კომენტარი ზუგდიდში მყოფმა ირაკლი კობახიძემ გააკეთა. მისი თქმით, პარტიასთან არანაირი კავშირი არა აქვს ბანერებს.ბანერები წარწერით „არა ნაცებს! არა ბოროტებას! არა ღალატს!“ ქუჩებში 17 სექტემბერს გამოჩნდა. მათი ავტორი ბიზნესმენი მიხეილ გაბრიაძეა.ბანერები ვაქცინაციის ბილბორდებზე კომპანია „ალმამ“ გადააკრა. დაავადებათა კონტროლისა და საზოგადოებრივი ჯანმრთელობის ეროვნულმა ცენტრმა კომპანია “ალმას” ოფიციალური წერილით მიმართა და სისხლიანი ბანერების ჩანაცვლება მოითხოვა ისევ ვაქცინაციის მხარდამჭერი ბანერებით, რაზეც „ალმამ“’ ოფიციალური პასუხი წერილობით გაავრცელა, სადაც ნათქვამია რომ მიმდინარე წლის აპრილის თვეში, სარეკლამო კომპანია „ალმამ“, დაავადებათა კონტროლისა და საზოგადოებრივი ჯანმრთელობის ეროვნული ცენტრის მხარდასაჭერად, ქვეყნის მასშტაბით უსასყიდლოდ გამოყო 40 გარე სარეკლამო მონიტორი და 14 სარეკლამო ბილბორდი, რითაც მაქსიმალურად შეუწყო ხელი საზოგადოების ვაქცინაციისკენ მოწოდების კამპანიის ეფექტიანად განხორციელებას.ჩვენ სრულიად ვემიჯნებით ნებისმიერი ფორმით გამოხატულ ქმედებას თუ ქმედებებს, რომელიც იწვევს სიძულვილს, აგრესიას და ჩვენი ქვეყნის საზოგადოების შემდგომ პოლარიზაციას. შესაბამისად, ჩვენთვის აბსოლუტურად მიუღებელია იმ სარეკლამო ბანერების შინაარსი და ვიზუალიზაცია, რამაც საზოგადოების ნაწილის ობიექტური გაღიზიანება გამოიწვია“, – ნათქვამია კომპანიის განცხადებაში.