თურქეთში, ტრაპზონიდან 130 კილომეტრში ავტობუსი, რომლითაც ქართული ცეკვის საბავშვო ანსამბლ „ლამპრების“ წევრები გასტროლებზე ბულგარეთში მიემგზავრებოდნენ, ავარიაში მოჰყვა. ინფორმაციას ამის შესახებ თურქული მედია ავრცელებს.
ადგილობრივი პოლიციის ინფორმაციით, ავტობუსი გადაბრუნდა, რაც სავარაუდოდ, საბურავის გახეთქვამ გამოიწვია.
ავტობუსში 38 ადამიანი იმყოფებოდა, დაშავებულები პირველადი დახმარებისთვის სხვადასხვა საავადმყოფოებში არიან გადანაწილებული. დაზიანებები ძირითად უმნიშვნელოა, მსუბუქი. შედარებით სერიოზულია ორი მგზავრის მდგომარეობა, თუმცა სიცოცხლისათვის საშიში დაზიანებები არც მათ აქვთ.
„დაშავებულები სხვადასხვა საავადმყოფოში არიან გადაყვანილი, ამ ეტაპზე საკონსულოს თანამშრომლები დაყოფილები ვართ და ადგილზე ვარკვევთ ბავშვების ჯანმრთელობის მდგომარეობას. მე მოვედი საავადმყოფოში, სადაც არის სამი ბავშვი. ისინი თავს კარგად გრძნობენ , დაშავებულები არიან მსუბუქად,“ – აცხადებს საქართველოს ვიცე-კონსული ტრაპზონში, მანანა ბერიაშვილი.