თბილისში აღმაშენებლის გამზირზე ე.წ. "ქართველთა მარში" დასრულდა. მსვლელობა #24-ე საჯარო სკოლიდან დაიწყო და „მარჯანიშვილის“ მეტროსთან სიტყვით გამოსვლებით დასრულდა.
როგორც გრუზინი ჯეელების მარშის (ტაბურეტები აკლდათ) ერთ-ერთმა ორგანიზატორმა სანდრო ბრეგაძემ სიტყვით გამოსვლისას განაცხადა, დღეს, 14 ივლისს დაიწყო "ახალი ეროვნულ-განმათავისუფლებელი მოძრაობა".
"აქციის მოთხოვნები შემდეგია: სასწრაფო წესით იყოს მიღებული ახალი საემიგრაციო კანონი, რომლის მიხედვითაც, მაქსიმალურად გამკაცრდება საქართველოში ბინადრობის უფლების მინიჭება და მოქალაქეობის მინიჭების პროცესი; ასევე, აღსრულდეს კანონი და სასწრაფო წესით იყოს დეპორტირებული საქართველოს ტერიტორიიდან ყველა არალეგალი, კრიმინალი უცხოელი, რომელიც უკანონოდ იმყოფება საქართველოს ტერიტორიაზე და მესამე, შინაგან საქმეთა სამინისტრომ დაიწყოს ქმედითი მასობრივი ღონისძიებები არალეგალური კრიმინალური საქმიანობის აღსაკვეთად, რასაც ახორციელებენ უცხოელები, ძირითადად, ეს შეეხება ნარკოტიკებით ვაჭრობას და პროსტიტუციას; მეოთხე მოთხოვნა არის, აიკრძალოს ”ნაციონალური მოძრაობა” და შემოიღონ კანონი, რომლის მიხედვითაც აიკრძალება უცხოეთიდან არასამთავრობო ორგანიზაციების დაფინანსება”, – განაცხადა აქციის ერთ-ერთმა ორგანიზატორმა სანდრო ბრეგაძემ.
აქციის მონაწილეებმა პეტიცია შეიმუშავეს, რომელსაც მთავრობას გადაუგზავნიან.
აქციის მონაწილეები ხელისუფლებას ერთკვირიან ვადას აძლევენ მათი მოთხოვნების შესასრულებლად, წინააღმდეგ შემთხვევაში პერმანენტული აქციებით იმუქრებიან.