გლდანის ციხეში პატიმარმა ელემენტები, რკინა, მაგნიტი და შუშის ნატეხები გადაყლაპა. ინფორმაციას მთავარი არხი ავრცელებს. მსჯავრდებული მთავარ არხს თავად დაუკავშირდა. სატელეფონო საუბარში პატიმარი განმარტავს, რომ იგი ციხის ადმინისტრაციისგან უშედეგოდ ითხოვს გადაიყვანონ კლინიკაში და ჩაუტარდეს შესაბამისი დახმარება.

“გადაყლაპული მაქვს 2 ცალი ელემენტი, 4 ცალი რკინა, 4 ცალი მაგნიტი, შუშის ნატეხები. ოპერაციას ვითხოვ, ყურადღებას, ვითხოვ, დაკვირვების ქვეშ დამტოვონ ვივამედში, კლინიკაში, ვითხოვ გადამიყვანონ კლინიკაში”. – ამბობს მთავარ არხთან სატელეფონო საუბრისას პატიმარი.

ტაბულას პენიტენციურ სამსახურში მომხდართან დაკავშირებით უთხრეს, რომ ჯანმრთელობის მდგომარეობა პერსონალურ ინფორმაციას წარმოადგენს და მსჯავრდებულის წერილობითი ნებართვის გარეშე ინფორმაციას ვერ გასცემენ, – “მე-18 პენიტენციური დაწესებულება ისედაც სამკურნალო დაწესებულებაა”. – ამბობენ უწყებაში.

ცნობისათვის: ირაკლი ღარიბაშვილმა ხონის მერობის კანდიდატის წარდგენისას განაცხადა: .,ცნობილ გლდანის ციხეში, რომელიც სავსე იყო ჯალათებით და ხდებოდა ადამიანების წამება და გაუპატიურება, დღეს პატიმრებს მოჰყავთ ჟოლო, ციხის ტერიტორიაზე, მცირე მეწარმეობა მოვაწყობინეთ, დავეხმარეთ და ასე ვუწყობთ ხელს მათ რესოციალიზაციას. ეს არის ჩვენი ხელწერა, ამით განსხვავდება ქართული ოცნება ნაცმოძრაობისგან და სააკაშვილის მჩაგვრელი რეჟიმისგან. ამიტომაც, ჩვენ ყველამ მაქსიმალური მობილიზება უნდა გავაკეთოთ. რა თქმა უნდა ქართული ოცნება ძლიერად გაიმარჯვებს ამ არჩევნებში ყველა ქალაქში და ყველა მუნიციპალიტეტში”