ქართული თეატრის ლეგენდები ზუგდიდში არიან – კახი კავსაძე და ჯემალ ღაღანიძე პირველები ჩამოვიდნენ ჩვენს ქალაქში. მსახიობებმა მგზავრობა მატარებლით ისურვეს. ზუგდიდის რკინიგზის სადგურზე მათ არასამთავრობო ორგანიზაცია „არტ უნივერსალის“ დამფუძნებელი და ხელმძღვანელი ხატია ჯანაშია პირადად დახვდა, მოგვიანებით კი ახალგაზრდებმა თეატრის ვარსკვლავებს პერფორმანსი მოუწყვეს.
ქართული თეატრის ვარსკვლავები არასამთავრობო ორგანიზაცია „არტ უნივერსალის“ მოწვევით ჩამოვიდნენ. ხვალ, 10 ივლისს, 19 საათზე, კულტურის ცენტრ ოდიშის დარბაზში რუსთაველის თეატრი წარმოადგენს სპექტაკლს „მოხუცი ჯამბაზები“. არტ უნივერსალის დამფუძნებლის და ხელმძღვანელის, ხატია ჯანაშიას თქმით, ახალგაზრდების სურვილი იყო მსგავსი პერფორმანსით დახვედროდნენ მსახიობებს.
რაც შეეხება სპექტაკლს – მოქმედება მოხუცთა თავშესაფარში მიმდინარეობს. მისი ბინადარნი ყოფილი მსახიობები არიან. ადამიანები, რომლებმაც მთელი ცხოვრება სცენაზე გაატარეს. მათ ახლაც ჩაესმით თაყვანისმცემელთა აპლოდისმენტები. ამ მოხუცებისთვის განსაკუთრებით ძნელია იმის აღქმა, რომ უკვე აღარ არიან საჭირონი. ისინი ახლა მხოლოდ მოგონებებით ცხოვრობენ. თეატრთან განშორება ჭეშმარიტი არტისტისთვის სიკვდილის ტოლფასია, მაგრამ რა იქნება სიკვდილის შემდეგ? წარმოდგენაში გულისშემძვრელად გაისმის ერთ-ერთი გმირის შეკითხვა:
“ნეტავ, იმქვეყნად თეატრი არის?!”
სპექტაკლის რეჟისორი გოჩა კაპანაძეა, ხოლო მონაწილეობენ კახი კავსაძე, მანანა გამცემლიძე, თენგიზ გიორგაძე, მარინა კახიანი, ზაზა ლებანიძე, ჯემალ ღაღანიძე, დარეჯან ხარშილაძე და ნანუკა ხუსკივაძე.