ეროვნულ-დემოკრატიული ინსტიტუტის (NDI) კვლევის მიხედვით, გამოკითხულთა უდიდესი ნაწილი, 59% თვლის, რომ ქვეყნის წინაშე მდგარი ყველაზე დიდი ეკონომიკური პრობლემა უმუშევრობაა.

მოსახლეობის 42%-ის აზრით, მთავარ პრობლემას ფასების ზრდა, ანუ ინფლაცია წარმოადგენს. საქართველოს სტატისტიკის ეროვნული სამსახურის  ინფორმაციით, ინფლაციის მაჩვენებელი ამჟამად 11.9%-იან ნიშნულზეა.

მოსახლეობის 19% მთავარ ეკონომიკურ გამოწვევად სიღარიბეს ასახელებს, 17% – ლარის გაუფასურებას, 16% – დაბალ ხელფასებს, 12% კი – მაღალ გადასახადებს.

ეკონომიკური მდგომარეობის გაუარესებაზე  მიუთითებს მოსახლეობის ფინანსური მდგომარეობის შეფასებაც. გამოკითხულთა 68% თვლის, რომ პანდემიანმდელ პერიოდთან შედარებით ნაკლები რაოდენობის პროდუქტებისა და სერვისების შეძენის შესაძლებლობა აქვს.

მხოლოდ 2% მიიჩნევს, რომ COVID-19 პანდემიის შემდეგ მათი ფინანსური შესაძლებლობები გაიზარდა.